موسیقی ہدایت کار کے لیٔے۔ داویؔد کا زبُور۔
¹ اَے یَاہوِہ، مَیں نے آپ میں پناہ لی ہے؛
مُجھے کبھی شرمندہ نہ ہونے دیں؛
اَے خُدا اَپنی راستبازی کی خاطِر مُجھے رِہائی بخشیں۔
² اَپنا کان میری طرف لگائیں،
اَور جلدی سے مُجھے بچائیں؛
میری پناہ کی چٹّان بنیں،
اَور مُجھے بچانے کے لیٔے محکم قلعہ بنیں۔
³ چونکہ آپ میری چٹّان اَور میرا قلعہ ہیں،
اِس لیٔے اَپنے نام کی خاطِر میری رہبری اَور رہنمائی کریں۔
⁴ مُجھے اِس جال میں سے چھُڑا لیں جو میرے لیٔے بچھایا گیا ہے،
کیونکہ آپ میری پناہ گاہ ہیں
⁵ میں اَپنی جان آپ کے ہاتھوں میں سونپتا ہُوں؛
اَے یَاہوِہ، سچّائی کے خُدا! میرا فدیہ دیں۔
⁶ مُجھے اُن لوگوں سے نفرت ہے جو جھوٹے بُتوں کی پرستش کرتے ہیں؛
میں تو یَاہوِہ پر توکّل کرتا ہُوں۔
⁷ مَیں آپ کی شفقت و مَحَبّت سے خُوش و خُرّم ہوں گا،
کیونکہ آپ نے میری جان کے دُکھ کو دیکھاہے
اَور آپ میری جان کی مُصیبت سے واقف ہیں۔
⁸ آپ نے مُجھے دُشمن کے ہاتھ میں نہیں جانے دیا
بَلکہ میرے پاؤں کشادہ جگہ میں قائِم کر دئیے۔
⁹ اَے یَاہوِہ، مُجھ پر رحم کریں کیونکہ مَیں مُصیبت میں ہُوں؛
اَور میری آنکھیں غم کے مارے کمزور ہو چُکی ہیں،
اَور میری جان اَور میرا جِسم رنج سے گھُل گیٔے ہیں۔
¹⁰ میری زندگی سخت تکلیف میں ہے؛
میری عمر کراہتے کراہتے فنا ہو گئی؛
میری بدکاریوں کے باعث میری قُوّت گھٹ گئی،
اَور میری ہڈّیاں کمزور ہو گئیں۔
¹¹ میرے سارے دُشمنوں کے سبب سے،
میں اَپنے ہمسایوں کے لیٔے حقارت کا؛
اَور اَپنے دوستوں کے لیٔے خوف کا باعث بَن گیا ہُوں۔
یہاں تک کہ جو مُجھے باہر دیکھتے ہیں وہ مُجھ سے دُور بھاگتے ہیں۔
¹² اُنہُوں نے مُجھے اَیسا بھُلا دیا ہے گویا میں مَر چُکا ہُوں؛
میں ٹوٹے ہُوئے مٹّی کے برتن کی مانند ہو چُکا ہُوں۔
¹³ کیونکہ مَیں کیٔی لوگوں کی طرف سے بدنام کیا جا رہا ہُوں؛
”ہر طرف خوف ہی خوف ہے!“
وہ میرے خِلاف سازش کرتے ہیں،
اَور میری جان لینے کے منصُوبے باندھتے ہیں۔
¹⁴ لیکن اَے یَاہوِہ، میرا توکّل آپ پر ہے؛
میں کہتا ہُوں، ”آپ میرے خُدا ہیں۔“
¹⁵ میرے ایّام آپ کے ہاتھ میں ہیں؛
مُجھے میرے دُشمنوں سے
اَور میرا تعاقب کرنے والوں سے چھُڑا لیں۔
¹⁶ اَپنے خادِم پر اَپنا چہرہ جلوہ گِر فرمائیں؛
اَور اَپنی لافانی مَحَبّت سے مُجھے بچا لیں۔
¹⁷ یَاہوِہ! مُجھے شرمندہ نہ ہونے دیں،
کیونکہ مَیں نے آپ کو پُکارا ہے؛
بدکار لوگ شرمندہ ہُوں
اَور پاتال میں خاموشی سے پڑے رہیں۔
¹⁸ اُن کے دروغ گو لب خاموش ہو جایٔیں،
کیونکہ وہ غُرور اَور حقارت سے
راستبازوں کے خِلاف تکبُّر آمیز باتیں کرتے ہیں۔
¹⁹ آپ نے اَپنے ڈرنے والوں کے لیٔے،
کتنی بڑی نِعمت رکھ چھوڑی ہے،
جسے آپ بنی آدمؔ کے سامنے
اُنہیں عطا کرتے ہیں جو آپ میں پناہ لیتے ہیں۔
²⁰ آپ اُنہیں لوگوں کی سازشوں سے
اَپنی حُضُوری کی پناہ گاہ میں چُھپائے رکھتے ہیں
اَور اَپنے مَسکن میں
اُنہیں اِلزام تراش زبانوں سے محفوظ رکھتے ہیں۔
²¹ یَاہوِہ کی سِتائش ہو!
کیونکہ جَب مَیں اَیسے شہر میں تھا جسے دُشمنوں نے گھیر رکھا تھا
تو اُنہُوں نے مُجھے اَپنی عجِیب شفقت و مَحَبّت دِکھائی۔
²² مَیں نے گھبرا کر عجلت میں کہہ دیا تھا،
”مَیں آپ کے سامنے سے کاٹ ڈالا گیا ہُوں!“
لیکن جَب مَیں نے آپ سے فریاد کی
تَب آپ نے میری رحم کی اِلتجا کو سُن لیا۔
²³ یَاہوِہ سے مَحَبّت رکھو، اَے اُن کے سَب وفادار مُقدّسین!
یَاہوِہ سچّے مُومِنین کو سلامت رکھتے ہیں،
لیکن مغروُروں کو خُوب بدلہ دیتے ہیں۔
²⁴ لہٰذا تُم سَب جو یَاہوِہ پر آس رکھتے ہو،
مضبُوط ہو جاؤ اَور ہمّت باندھو!