داویؔد کا زبُور۔ ہیکل کی تقدیس کا نغمہ۔
¹ اَے یَاہوِہ، مَیں آپ کی تمجید کروں گا،
کیونکہ آپ نے مُجھے گہرائیوں میں سے نکال کر سربُلند کیا
اَور میرے دُشمنوں کو مُجھ پر خُوش ہونے کا موقع نہ دیا۔
² اَے یَاہوِہ، میرے خُدا! مَیں نے آپ سے فریاد کی،
اَور آپ نے مُجھے شفا بخشی۔
³ اَے یَاہوِہ، آپ مُجھے پاتال میں سے نکال لائے ہیں؛
اَور آپ نے مُجھے قبر میں نہیں جانے دیا۔
⁴ اَے یَاہوِہ کے مُقدّسو، اُن کی سِتائش کے نغمہ گاؤ؛
اُن کے پاک نام کی سِتائش کرو۔
⁵ کیونکہ اُن کا قہر چند وقفوں تک رہتاہے،
لیکن اُن کی نظرِکرم عمر بھر تک رہتی ہے؛
کہرام شاید رات بھر جاری رہے،
لیکن صُبح کو خُوشی لَوٹ آتی ہے۔
⁶ مَیں نے اِطمینان کے وقت اَپنے آپ سے کہاتھا:
”مَیں کبھی نہ ڈگمگاؤں گا۔“
⁷ اَے یَاہوِہ، جَب آپ نے مُجھ پر نظرِکرم کی،
تَب آپ نے مُجھے پہاڑ کی مانند ثابت قدم کر دیا؛
لیکن جَب آپ نے اَپنا چہرہ چھُپا لیا،
تو میرے اوسان خطا ہو گئے۔
⁸ اَے یَاہوِہ، مَیں نے آپ سے فریاد کی؛
اَے خُداوؔند، مَیں نے آپ سے رحم کی مِنّت کی:
⁹ ”میری تباہی سے،
اَور میرے پاتال میں جانے سے کیا فائدہ؟
کیا خاک آپ کی سِتائش کرےگی؟
کیا وہ آپ کی صداقت کا اعلان کرےگی؟
¹⁰ اَے یَاہوِہ، سُنیں اَور مُجھ پر رحم کریں؛
اَے یَاہوِہ، میرا مددگار ہوں۔“
¹¹ آپ نے میرے ماتم کو رقص سے بدل دیا؛
آپ نے میرے غم کا ٹاٹ اُتار ڈالا اَور مُجھے خُوشی سے مُلبّس کیا،
¹² تاکہ میرا دِل آپ کی سِتائش کرے اَور خاموش نہ رہے،
اَے یَاہوِہ، میرے خُدا! میں ہمیشہ آپ کا شُکر بجا لاتا رہُوں گا۔