داویؔد کا زبُور۔
¹ اَے آسمانی مخلُوق! یَاہوِہ کی حَمد کرو،
صِرف یَاہوِہ ہی کے جلال اَور اُن کی قُدرت کی تعظیم کرو۔
² یَاہوِہ کے نام کے مطابق اُن کو جلال دو؛
پاکیزگی کی شوکت میں ہوکر یَاہوِہ کی عبادت کرو۔
³ یَاہوِہ کی آواز زورآور سمُندر کی سطح پر گونجتی ہے؛
خُدائے ذُوالجلال گرجتے ہیں،
یَاہوِہ گھنے بادلوں کے اُوپر گرجتے ہیں۔
⁴ یَاہوِہ کی آواز میں قُدرت ہے؛
یَاہوِہ کی آواز جلالی ہے۔
⁵ یَاہوِہ کی آواز دیوداروں کو توڑ ڈالتی ہے؛
یَاہوِہ لبانونؔ کے دیوداروں کے ٹکڑے ٹکڑے کر ڈالتے ہیں۔
⁶ یَاہوِہ لبانونؔ کو بچھڑے کی طرح،
اَور سِریُونؔ کو جنگلی سانڈ کی مانند کُداتے ہیں۔
⁷ یَاہوِہ کی آواز
بجلی کے شُعلوں سے ضرب لگاتی ہے۔
⁸ یَاہوِہ کی آواز بیابان کو ہلا دیتی ہے؛
یَاہوِہ قادِسؔ کے بیابان پر لرزہ طاری کر دیتے ہیں۔
⁹ یَاہوِہ کی آواز سے ہِرنیوں کے حَمل گِر جاتے ہیں؛
وہ جنگلوں کو بے برگ کردیتی ہے۔
اَور اُن کے ہیکل میں ہر کویٔی پُکار اُٹھتا ہے، ”یَاہوِہ کا جلال ہی جلال!“
¹⁰ یَاہوِہ طُوفان پر تخت نشین ہیں؛
بَلکہ یَاہوِہ ہمیشہ کے لیٔے بادشاہ بَن کر تخت نشین رہتے ہیں۔
¹¹ یَاہوِہ اَپنی اُمّت کو قُوّت بخشتے ہیں؛
یَاہوِہ اَپنی اُمّت کو سلامتی کی برکت دیتے ہیں۔