داویؔد کا زبُور۔
¹ یَاہوِہ میری رَوشنی اَور میری نَجات ہیں۔
مُجھے کس کا ڈر ہے؟
یَاہوِہ میری زندگی کا محکم قلعہ ہیں۔
مُجھے کس کی ہیبت ہے؟
² جَب بدکار مُجھے کھا ڈالنے کے لیٔے
مُجھ پر چڑھ آئیں گے،
جَب میرے دُشمن اَور میرے مُخالف مُجھ پر حملہ کریں گے،
تو وہ خُود ہی ٹھوکر کھا کر گِر پڑیں گے۔
³ خواہ لشکر میرا محاصرہ کر لے،
میرا دِل خوف نہ کھائے گا؛
خواہ میرے خِلاف جنگ چھڑ جائے،
تَب بھی میں خُدا پر بھروسا رکھوں گا۔
⁴ مَیں نے یَاہوِہ سے ایک درخواست کی ہے،
میں یہ چاہتا ہُوں:
عمر بھر میں یَاہوِہ کے گھر میں رہُوں،
یَاہوِہ کا جمال دیکھتا رہُوں
اَور اُنہیں اُس کے مَقدِس میں ڈھونڈتا رہُوں۔
⁵ کیونکہ مُصیبت کے دِن
وہ مُجھے اَپنے مَسکن میں محفوظ رکھیں گے؛
وہ مُجھے اَپنے خیمہ میں پناہ دے کر چُھپائے رکھیں گے؛
اَور مُجھے چٹّان پر چڑھا دیں گے۔
⁶ تَب میرا سَر اُن دُشمنوں سے اُونچا ہوگا،
جنہوں نے مُجھے گھیر رکھا ہے
اَور مَیں خُوشی سے للکار کر اُن کے خیمہ میں قُربانی گزرانوں گا؛
میں یَاہوِہ کے لیٔے گاؤں گا اَور مدح سرائی کروں گا۔
⁷ اَے یَاہوِہ، جَب مَیں پُکاروں تو میری آواز سُنیں؛
مُجھ پر رحم فرمائیں اَور مُجھے جَواب دیں۔
⁸ میرا دِل آپ کے متعلّق کہتاہے، ”آپ کے دیدار کا طالب ہو!“
اَے یَاہوِہ، مَیں آپ کے دیدار کا طالب رہُوں گا۔
⁹ مُجھ سے روپوش نہ ہوں،
اَپنے خادِم کو غُصّہ میں آکر نہ نکالیں؛
کیونکہ آپ میرے مددگار رہے ہیں۔
اَے میرے مُنجّی خُدا،
مُجھے مُسترد نہ کریں اَور نہ ہی ترک کریں۔
¹⁰ خواہ میرے باپ اَور ماں مُجھے ترک کر دیں،
تو بھی یَاہوِہ مُجھے قبُول فرمائیں گے۔
¹¹ اَے یَاہوِہ، مُجھے اَپنی راہ سکھائیں؛
اَور مُجھ پر ظُلم ڈھانے والوں کے سبب سے
مُجھے راہِ راست پر چلائیں۔
¹² مُجھے میرے مُخالفوں کی مرضی پر نہ چھوڑیں،
کیونکہ جھُوٹے گواہ اَور تشدّد بھڑکانے والے،
میرے خِلاف اُٹھے ہیں۔
¹³ مُجھے اَب بھی اِس بات کا یقین ہے:
کہ میں زندوں کی زمین پر
یَاہوِہ کے اِحسَان کو دیکھ لُوں گا۔
¹⁴ یَاہوِہ کا اِنتظار کرو؛
ثابت قدم رہ کر حوصلہ رکھو،
اَور یَاہوِہ پر آس رکھو۔