داویؔد کا زبُور۔
¹ یہ زمین اَور اُس کی ساری چیزیں یَاہوِہ ہی کی مِلکیّت ہیں،
جہان اَور اہلِ جہان بھی جو اِس میں رہتے سَب اُن ہی کے ہیں؛
² کیونکہ اُن ہی نے سمُندروں کے اُوپر اُس کی بُنیاد رکھی
اَور سیلابوں پر اُسے قائِم کیا۔
³ یَاہوِہ کے پہاڑ پر کون چڑھے گا؟
اَور اُن کے پاک مَقدِس میں کون کھڑا رہے گا؟
⁴ وُہی جِس کے ہاتھ صَاف اَور دِل پاک ہو،
جسے بُتوں سے کویٔی رغبت نہیں
اَورجو جھُوٹی قَسم نہیں کھاتا۔
⁵ وہ یَاہوِہ کی طرف سے برکت پایٔےگا
اَور اَپنے مُنجّی خُدا کی طرف سے بَری ہونے کا حق۔
⁶ آپ کے طالبوں کی پُشت اَیسی ہی ہوتی ہے،
یہی آپ کی نظرِکرم کے خواہاں ہیں، اَے یعقوب کے خُدا۔
⁷ اَے پھاٹکو! اَپنے سربُلند کرو؛
اَے قدیم دروازو! اُونچے ہو جاؤ،
تاکہ جلال کا بادشاہ داخل ہو۔
⁸ یہ جلال کا بادشاہ کون ہے؟
یَاہوِہ، جو قوی اَور قادر،
یَاہوِہ جو جنگ میں زورآور ہیں۔
⁹ اَے پھاٹکو، اَپنے سربُلند کرو؛
اَے قدیم دروازو! اُونچے ہو جاؤ،
تاکہ جلال کا بادشاہ داخل ہو۔
¹⁰ یہ جلال کا بادشاہ کون ہے؟
قادرمُطلق یَاہوِہ خُدا۔
وُہی جلال کا بادشاہ ہیں۔