داویؔد کا زبُور۔
¹ اَے یَاہوِہ، میرے خُدا! میں اَپنی جان آپ کی طرف اُٹھاتا ہُوں،
کیونکہ میرا توکّل آپ پر ہے۔
² اَے میرے خُدا، مَیں نے آپ پر توکّل کیا ہے۔
مُجھے شرمندہ نہ ہونے دیں،
نہ میرے دُشمنوں کو فتح کے شادیانے بجانے دیں۔
³ جو آپ سے اُمّید لگائے بیٹھا ہو
وہ کبھی شرمندہ نہ ہوگا،
لیکن جو ناحق بےوفائی کرتے ہیں،
شرمندہ ہوں گے۔
⁴ اَے یَاہوِہ، مُجھے اَپنی راہ دِکھائیں،
اَور مُجھے اَپنی راہوں کی تعلیم دیں؛
⁵ اَپنی سچّائی پر مُجھے چلائیں اَور تعلیم دیں،
کیونکہ آپ میرے مُنجّی خُدا ہیں،
اَور دِن بھر میں آپ ہی سے اُمّید لگائے رہتا ہُوں۔
⁶ اَے یَاہوِہ، اَپنی بڑی شفقت و مَحَبّت کو یاد کریں،
کیونکہ وہ اَزل سے ہیں۔
⁷ میری جَوانی کے گُناہوں کو
اَور میرے باغی طریقوں کو یاد نہ کریں؛
اَپنی شفقت کے مُطابق مُجھے یاد فرمائیں،
کیونکہ اَے یَاہوِہ، آپ نیک ہیں۔
⁸ یَاہوِہ نیک اَور راست ہیں؛
اِس لیٔے وہ گُنہگاروں کو اَپنی راہوں کی تعلیم دیتے ہیں۔
⁹ وہ حلیموں کو بھلائی کی ہدایت کرتے ہیں،
اَور اُنہیں اَپنی تعلیم کی راہ پر چلاتے ہیں۔
¹⁰ جو یَاہوِہ کے عہد کی شَریعت پر عَمل کرتے ہیں،
اُن کے لیٔے اُس کی سَب راہیں شفقت آمیز اَور سچّی ہوتی ہیں۔
¹¹ اَے یَاہوِہ، اَپنے نام کی خاطِر،
میری بدکاری مُعاف کر دیں، حالانکہ وہ سنگین ہے۔
¹² یَاہوِہ کا خوف رکھنے والا شخص کون ہے؟
وہ اُسے اُس راہ کی تعلیم دیں گے جو اُس کے لیٔے چُنی گئی ہے۔
¹³ وہ اَپنے دِن خُوشحالی میں گزارے گا،
اَور اُس کی اَولاد زمین کی وارِث ہوگی۔
¹⁴ یَاہوِہ اَپنے خوف رکھنے والوں پر اَپنے راز کھولتے ہیں؛
اَور اَپنا عہد اُن پر ظاہر کرتے ہیں۔
¹⁵ میری آنکھیں سدا یَاہوِہ پر لگی رہتی ہیں،
کیونکہ صِرف وُہی میرے پاؤں کو پھندے سے چھُڑائیں گے۔
¹⁶ میری طرف متوجّہ ہوکر اَور مُجھ پر مہربانی کریں،
کیونکہ مَیں اکیلا اَور مُصیبت زدہ ہُوں۔
¹⁷ میرے دِل کی بڑھی ہوئی پریشانیوں کو دُور کریں،
مُجھے میری تکلیف سے رِہائی بخشیں۔
¹⁸ میری مُصیبت اَور تکلیف پر نظر کریں،
اَور میرے سَب گُناہ مُعاف فرمائیں۔
¹⁹ میرے دُشمنوں کو دیکھ وہ شُمار میں کتنے بڑھ گیٔے ہیں
اَور مُجھ سے کس قدر سخت عداوت رکھتے ہیں!
²⁰ میری جان کی حِفاظت کریں اَور مُجھے چھُڑائیں؛
مُجھے شرمندہ نہ ہونے دیں،
کیونکہ مَیں آپ ہی میں پناہ لیتا ہُوں۔
²¹ صداقت اَور راستبازی میری حِفاظت کریں،
کیونکہ مُجھے یَاہوِہ آپ کی ہی آس ہے۔
²² اَے خُدا، اِسرائیل کو بچائیں،
اُس کی ساری مُشکلات سے چھُڑا لیں۔