ایک نغمہ۔ آسفؔ کا زبُور۔
¹ اَے خُدا، خاموش نہ رہیں؛
نہ نظر اَنداز کریں
اَے خُدا، مُجھ سے دُور نہ ہوں۔
² دیکھیں، آپ کے دُشمنوں نے کیسا اودھم مچا رکھا ہے،
اَور آپ کے مخالفین نے سَر اُٹھایا ہے۔
³ وہ مکّاری سے آپ کے لوگوں کے خِلاف سازش کرتے ہیں؛
اَور جنہیں آپ عزیز رکھتے ہیں اُن کے خِلاف منصُوبے باندھتے ہیں۔
⁴ اُنہُوں نے خُود سے کہا، ”آؤ، ہم اُس ساری قوم ہی کو تباہ کر ڈالیں،
تاکہ اِسرائیل کا نام و نِشان ہی باقی نہ رہے۔“
⁵ وہ یکدل ہوکر باہم مشورہ کرتے ہیں؛
اَور آپ کے خِلاف عہد باندھتے ہیں۔
⁶ یعنی اِدُوم کے اہلِ خیمہ اَور اِشمعیلی،
مُوآبی اَور ہاگریؔ،
⁷ گیبلی، عمُّونی اَور عمالیقی،
اَور اہلِ صُورؔ، فلسطینی باشِندوں سمیت۔
⁸ اشُوری بھی اُن سے ملے ہُوئے ہیں
تاکہ بنی لَوطؔ کو مدد پہُنچائیں۔
⁹ آپ اُن کے ساتھ وَیسا ہی سلُوک کریں جَیسا مِدیانیوں کے ساتھ،
اَور جَیسا دریائے قیشونؔ پر سیسؔرا اَور یابینؔ کے ساتھ کیا گیا تھا۔
¹⁰ جو عینؔ دورؔ میں ہلاک ہُوئے
وہ گویا زمین کی کھاد بَن گیٔے۔
¹¹ اُن کے اُمرا کو عوریبؔ اَور زئیبؔ کی،
بَلکہ اُن کے سَب اُمرا کو زِبؔح اَور ضلمُنعؔ کی مانند بنادے،
¹² جنہوں نے کہا، ”آؤ
ہم خُدا کی چراگاہوں پر قابض ہو جائیں۔“
¹³ اَے میرے خُدا! اُنہیں گھاس پھُوس کی مانند،
اَور ہَوا سے اُڑتی ہُوئی بھُوسی کی مانند بنا دیں۔
¹⁴ اَور اُس آگ کی مانند جو جنگل کو جَلا ڈالتی ہے،
یا اُس شُعلہ کی طرح جو پہاڑوں میں آگ لگا دیتاہے۔
¹⁵ لہٰذا اَپنی آندھی سے اُن کا تعاقب کریں
اَور اَپنے طُوفان سے اُنہیں پریشان کریں۔
¹⁶ اُن کے دُشمنوں کے چہروں کو شرمندگی سے بھر دیں
تاکہ اَے یَاہوِہ، لوگ آپ کے نام کے طالب ہُوں۔
¹⁷ وہ ہمیشہ شرمندہ اَور پریشان رہیں؛
اَور رُسوا ہوکر نِیست و نابود ہوں۔
¹⁸ تاکہ وہ جان لیں کہ آپ جِس کا نام یَاہوِہ ہے۔
آپ ساری زمین پر سَب سے اعلیٰ خُدا ہیں۔

(Biblica® آزادانہ اردو ہم عصر ترجمہ™)