ایک زبُور۔ ایک نغمہ۔ سَبت کے دِن پر مَبنی۔
¹ یَاہوِہ کی سِتائش کرنا
اَے خُداتعالیٰ، آپ کے نام کی مدح سرائی کرنا خُوب ہے،
² صُبح کو آپ کی شفقت و مَحَبّت کا
اَور رات کو آپ کی وفاداری کا،
³ دس تار والے بربط کے ساز پر
اَور سِتار کے خُوش آہنگ نغموں کے ساتھ اِظہار کرنا کیا ہی بھلا ہے۔
⁴ کیونکہ اَے یَاہوِہ، آپ اَپنے کارناموں سے مُجھے خُوش کرتے ہیں؛
اَور آپ کے ہاتھوں کی کاریگری کے باعث میں خُوشی سے گاتا ہُوں۔
⁵ اَے یَاہوِہ، آپ کے کارنامے کس قدر عظیم ہیں،
اَور آپ کے خیالات کس قدر عمیق ہیں!
⁶ بے حس اِنسان نہیں جانتے،
اَور احمق یہ نہیں سمجھتے،
⁷ حالانکہ بدکار لوگ گھاس کی مانند اُگ آتے ہیں
اَور سَب بد کِردار پھلتے پھُولتے ہیں،
تو بھی وہ ہمیشہ کے لیٔے تباہ کر دئیے جایٔیں گے۔
⁸ لیکن اَے یَاہوِہ، آپ ابدُالآباد سرفراز رہیں گے۔
⁹ لیکن اَے یَاہوِہ، دیکھیں! آپ کے دُشمن،
ہاں، آپ کے دُشمن یقیناً فنا ہوں گے؛
سَب بد کِردار پراگندہ کر دئیے جایٔیں گے۔
¹⁰ آپ نے میرا سینگ جنگلی سانڈ کے سینگ کی مانند بُلند کیا ہے؛
اَور مُجھے بڑے خالص تیل سے مَسح کیا ہے۔
¹¹ میری آنکھوں نے میرے دُشمنوں کی شِکست دیکھی ہے؛
اَور میرے کانوں نے میرے بدکار مُخالفوں کی پسپائی سُن لی ہے۔
¹² راستباز کھجور کے درخت کی مانند لہلہائیں گے،
اَور لبانونؔ کے دیودار کی مانند بڑھیں گے؛
¹³ جو یَاہوِہ کے گھر میں لگائے گیٔے ہیں،
وہ ہمارے خُدا کی بارگاہوں میں سرسبز ہوں گے۔
¹⁴ وہ بڑی عمر میں بھی پھل لائیں گے،
اَور تروتازہ اَور سرسبز رہیں گے،
¹⁵ اَور ظاہر کریں گے کہ، ”یَاہوِہ راست ہیں؛
وہ میری چٹّان ہیں، اَور اُن میں ناراستی نہیں۔“

(Biblica® آزادانہ اردو ہم عصر ترجمہ™)