ایتھانؔ اِزراحی کا مشکیل‏۔
¹ میں یَاہوِہ کی بڑی شفقت و مَحَبّت کے نغمہ ہمیشہ گاؤں گا؛
میں پُشت در پُشت
اَپنے مُنہ سے آپ کی وفاداری کا بَیان کرتا رہُوں گا۔
² میں اعلان کروں گا کہ آپ کی شفقت و مَحَبّت اَبد تک لازوال ہے،
اَور یہ کہ آپ نے اَپنی وفاداری کو آسمان ہی پر استحکام بخشا ہے۔
³ آپ نے کہا، ”مَیں نے اَپنے برگُزیدہ کے ساتھ عہد باندھا ہے،
اَور اَپنے خادِم داویؔد سے قَسم کھائی ہے،
⁴ ’میں تمہاری نَسل کو ہمیشہ تک قائِم رکھوں گا
اَور آپ کا تخت پُشت در پُشت بنائے رکھوں گا۔‘ “
⁵ اَے یَاہوِہ، افلاک مُقدّسین کی جماعت میں آپ کے عجائب کی،
اَور آپ کی وفاداری کی تعریف کرتے ہیں۔
⁶ کیونکہ اُوپر آسمانوں میں یَاہوِہ کا ثانی کون ہو سَکتا ہے؟
فرشتوں میں یَاہوِہ کی مانند کون ہے؟
⁷ مُقدّسوں کی مجلس میں خُدا کا بےحد خوف مانا جاتا ہے؛
وہ اَپنے اِردگرد کے سَب رہنے والوں سے زِیادہ مُہیب ہے۔
⁸ اَے یَاہوِہ، قادرمُطلق خُدا! آپ کی مانند کون ہے؟
اَے یَاہوِہ، آپ زبردست ہیں اَور آپ کی وفاداری آپ کے گِردوپیش ہے۔
⁹ سمُندر کی طغیانی پر آپ ہی حُکمرانی کرتے ہیں؛
جَب اُس کی موجیں تلاطم برپا کرتی ہیں تو آپ ہی اُنہیں ساکت کرتے ہیں۔
¹⁰ آپ نے راحبؔ کو مقتول کی مانند کُچل دیا؛
اَور اَپنے مضبُوط بازو سے اَپنے دُشمنوں کو پراگندہ کر دیا۔
¹¹ آسمان آپ کا ہے اَور زمین بھی آپ کی ہے؛
آپ نے ہی دُنیا اَور اُس کی ساری معموُری کی بُنیاد ڈالی۔
¹² آپ نے ہی شمال اَور جُنوب پیدا کئے؛
کوہِ تبورؔ اَور کوہِ حرمُونؔ آپ کے نام کے سبب سے خُوشی مناتے ہیں۔
¹³ آپ کا بازو قُدرت سے آراستہ ہے؛
آپ کا ہاتھ قوی اَور آپ کا داہنا ہاتھ بُلند ہے۔
¹⁴ راستبازی اَور اِنصاف آپ کے تخت کی بُنیاد ہیں؛
شفقت و مَحَبّت اَور وفاداری آپ کے آگے آگے چلتی ہیں۔
¹⁵ مُبارک ہیں وہ جنہوں نے آپ کی تحسین و آفرین کے نعرے بُلند کرنا سیکھا ہے،
اَورجو اَے یَاہوِہ، آپ کی حُضُوری کے نُور میں چلتے ہیں۔
¹⁶ وہ دِن بھر آپ کے نام سے مسرُور ہوتے ہیں؛
اَور آپ کی راستبازی سے سرفرازی پاتے ہیں۔
¹⁷ کیونکہ اُن کی شان اَور قُوّت آپ ہی ہیں،
اَور اَپنے لُطف و کرم سے ہمارے سینگ بُلند کرتے ہیں۔
¹⁸ بے شک ہماری سِپر یَاہوِہ کی طرف سے،
اَور ہمارے بادشاہ اِسرائیل کے مُقدّس خُدا کی طرف سے ہیں۔
¹⁹ ایک بار آپ نے رُویا میں کلام کیا،
اَور اَپنے مُقدّسین سے فرمایا:
”مَیں نے ایک سُورما کو قُوّت بخشی ہے؛
مَیں نے اُمّت میں سے ایک نوجوان کو سرفراز کیا ہے۔
²⁰ مَیں نے اَپنے خادِم داویؔد کو اُن کا بادشاہ مُقرّر کیا؛
اَور اَپنے مُقدّس تیل سے اُسے مَسح کیا۔
²¹ میرا ہاتھ اُسے سنبھالے گا؛
یقیناً میرا بازو اُسے تقویّت پہُنچائے گا۔
²² اَور داویؔد کا کویٔی دُشمن اُسے مطیع نہ کر پایٔےگا؛
اَور کویٔی بدکار آدمی اُس پر ظُلم نہ ڈھائے گا۔
²³ میں اُس کے مُخالفوں کو اُس کے سامنے کُچل دُوں گا
اَور اُس کے رقیبوں کو مار ڈالوں گا۔
²⁴ میری وفاداری اَور شفقت و مَحَبّت اُس کے ساتھ ہوگی،
اَور میرے نام کے ذریعہ اُس کا اِقبال بُلند ہوگا۔
²⁵ میں اُس کا ہاتھ سمُندر تک،
اَور اُس کے داہنے بازو کو دریاؤں تک بڑھاؤں گا۔
²⁶ وہ مُجھے پُکار کر کہے گا: ’آپ میرے باپ ہیں،
میرے خُدا اَور میری نَجات کی چٹّان ہیں۔‘
²⁷ میں اُسے اَپنا پہلوٹھا،
اَور دُنیا کا بادشاہ مُقرّر کروں گا۔
²⁸ میں اُس کے لیٔے اَپنی شفقت و مَحَبّت اَبد تک قائِم رکھوں گا،
اَور اُس کے ساتھ میرا عہد ہمیشہ اُستوار رہے گا۔
²⁹ میں اُس کی نَسل کو ہمیشہ تک قائِم رکھوں گا،
اَور اُس کے تخت کو اُس وقت تک، جَب تک آسمان قائِم ہے۔
³⁰ ”اگر اُس کے فرزند آئین کو ترک کر دیں
اَور میری شہادتوں پر عَمل نہ کریں،
³¹ اگر وہ میرے قوانین کو توڑ دیں
اَور میرے اَحکام نہ مانیں،
³² تو میں اُن کے جُرم کی سزا چھڑی سے،
اَور اُن کی بدکاری کی سزا کوڑوں سے دُوں گا؛
³³ لیکن مَیں اَپنی شفقت و مَحَبّت اُس پر سے نہ ہٹاؤں گا،
نہ اَپنی وفاداری پر آنچ آنے دُوں گا۔
³⁴ میں اَپنا عہد نہ توڑوں گا
اَور نہ اَپنے لبوں سے نکلے ہُوئے کلام کو بدلوں گا۔
³⁵ ایک بار میں اَپنے تقدُّس کی قَسم کھا چُکا ہُوں،
اَور مَیں داویؔد سے جھُوٹ نہ بولُوں گا۔
³⁶ کہ اُس کی نَسل ہمیشہ قائِم رہے گی
اَور اُس کا تخت میرے سامنے آفتاب کی مانند قائِم رہے گا؛
³⁷ اَور وہ اُس ماہتاب کی مانند ہمیشہ کے لیٔے اُستوار کیا جائے گا،
جو آسمان میں مُعتبر گواہ ہے۔“
³⁸ لیکن آپ نے تو ترک کر دیا اَور ٹھکرا دیا،
اَور آپ اَپنے ممسوح سے بہت ناراض ہو گئے۔
³⁹ آپ اَپنے خادِم کے ساتھ کئے ہُوئے عہد سے دست بردار ہو گئے
اَور آپ نے اُس کے تاج کو خاک میں مِلا کر ناپاک کر دیا۔
⁴⁰ آپ نے اُس کی سَب فصیلیں توڑ ڈالیں
اَور اُس کے محکم قلعوں کو کھنڈر بنا دیا۔
⁴¹ سَب آنے جانے والوں نے اُسے لُوٹ لیا؛
اَور وہ اَپنے ہمسایوں میں ملامت کا باعث ہو گیا۔
⁴² آپ نے اُس کے مُخالفوں کا داہنا ہاتھ بُلند کیا ہے؛
آپ نے اُس کے سَب دُشمنوں کو مسرُور کیا۔
⁴³ آپ نے اُس کی تلوار کی دھار کو موڑ دیا
اَور میدانِ جنگ میں اُس کے قدم جمنے نہ دئیے۔
⁴⁴ آپ نے اُس کی شوکت کا خاتِمہ کر دیا
اَور اُس کا تخت زمین پر پٹک دیا۔
⁴⁵ آپ نے اُس کے جَوانی کے دِن گھٹا دئیے؛
اَور اُسے شرم کا نقاب پہنا دیا۔
⁴⁶ اَے یَاہوِہ، کب تک؟ کیا آپ اَپنے آپ کو ہمیشہ کے لیٔے چُھپائے رکھیں گے؟
آپ کا غضب کب تک آگ کی مانند بھڑکتا رہے گا؟
⁴⁷ یاد کریں کہ میری زندگی کس قدر تیزرَو ہے،
آپ نے سَب بنی آدمؔ کو فُضول ہی پیدا کیا!
⁴⁸ وہ کون سا شخص ہے جو ہمیشہ زندہ رہے اَور موت کو نہ دیکھے،
یا اَپنے آپ کو پاتال میں جانے سے بچا سکے؟
⁴⁹ اَے خُداوؔند، آپ کی وہ پہلی شفقت و مَحَبّت کہاں گئی،
اَپنی وفاداری کے نام میں جِس کی قَسم آپ نے داویؔد سے کھائی تھی؟
⁵⁰ اَے خُداوؔند، یاد کریں کہ کس طرح آپ کے بندوں کا مضحکہ اُڑایا گیا،
اَور مَیں اَپنے سینے میں ساری قوموں کے طعنے لیٔے پھرتا ہُوں۔
⁵¹ اَے یَاہوِہ، وہ طعنے جِن کے ذریعہ آپ کے دُشمنوں نے مضحکہ اُڑایا،
جِس کے ساتھ اُنہُوں نے آپ کے ممسوح کا قدم قدم پر مضحکہ اُڑایا۔
⁵² یَاہوِہ کی ابدُالآباد سِتائش ہوتی رہے!
آمین ثُمّ آمین۔

(Biblica® آزادانہ اردو ہم عصر ترجمہ™)