موسیقی ہدایت کار کے لیٔے؛ یدُوتونؔ کے لیٔے۔
آسفؔ کا زبُور۔
¹ مَیں نے بُلند آواز سے خُدا سے فریاد کی؛
مَیں نے خُدا کو پُکارا کہ وہ میری سُنیں۔
² جَب مَیں مُصیبت میں مُبتلا ہُوا تو مَیں نے خُداوؔند کی تلاش کی؛
رات کو میں اَپنے ہاتھ پھیلائے رہا جو ڈھیلے نہ ہُوئے
اَور میری جان تسکین نہ پا سکی۔
³ اَے خُدا، مَیں نے آپ کو یاد کیا اَور کراہتا رہا؛
واویلا کرتے کرتے میری جان نڈھال ہو گئی ہے۔
⁴ آپ نے میری آنکھوں کو بند نہیں ہونے دیا؛
مُجھ میں بولنے کی تاب نہ تھی۔
⁵ میں گذشتہ ایّام،
اَور بیتے ہُوئے سالوں کے بارے میں سوچتا رہا؛
⁶ رات کو مُجھے اَپنے نغمہ یاد آئے،
میرا دِل غور کرتا رہا اَور میری رُوح جانچتی رہی:
⁷ ”کیا خُداوؔند ہمیشہ کے لیٔے ترک کر دیں گے؟
کیا وہ پھر کبھی مہربان نہ ہوں گے؟
⁸ کیا اُن کی لافانی مَحَبّت ہمیشہ کے لیٔے جاتی رہی؟
کیا اُن کا وعدہ سدا کے لیٔے جھُوٹا ٹھہرا؟
⁹ کیا خُدا رحم کرنا بھُول گئے؟
کیا اُنہُوں نے قہر میں اَپنی رحمت کو روک لیا ہے؟“
¹⁰ تَب مَیں نے خیال کیا، ”مَیں اِس کے لیٔے فریاد کروں گا اَور پُوچھوں گا:
کہ خُداتعالیٰ کے داہنے ہاتھ سے جو برکتیں مُجھے سالہا سال ملتی رہیں۔
¹¹ مَیں یَاہوِہ کے کارنامے یاد کروں گا؛
ہاں، مَیں آپ کے قدیم وقتوں کے معجزے یاد کروں گا۔
¹² مَیں آپ کے سَب کاموں پر غور کروں گا
اَور آپ کے سَب عظیم کارناموں دھیان کروں گا۔“
¹³ اَے خُدا، آپ کی روِشیں مُقدّس ہیں۔
کون سا معبُود ہمارے خُدا کی مانند عظیم ہے؟
¹⁴ آپ وہ خُدا ہیں جو عجِیب کام کرتے ہیں؛
آپ مُختلف قوموں کے درمیان اَپنی قُوّت کا مظاہرہ کرتے ہیں۔
¹⁵ آپ نے اَپنے قوی بازو سے اَپنی قوم،
یعنی یعقوب اَور یُوسیفؔ کی نَسل کو رِہائی بخشی۔
¹⁶ اَے خُدا، سمُندروں نے آپ کو دیکھا،
سمُندر آپ کو دیکھ کر خوفزدہ ہو گئے؛
اُن کی تہیں کانپ اُٹھیں۔
¹⁷ بادلوں نے مینہ برسایا،
افلاک گرجنے لگے؛
اَور آپ کے تیر ہر طرف چلے۔
¹⁸ بگولے میں سے آپ کی گرج کی آواز آئی،
اَور آپ کی برق نے جہاں کو رَوشن کر دیا؛
اَور زمین لرزی اَور کپکپائی۔
¹⁹ حالانکہ آپ کا راستہ سمُندر میں سے ہوتا ہُوا گزرا،
اَور آپ کی راہیں زورآور سمُندروں میں سے،
لیکن آپ کے نقش قدم دِکھائی نہ دئیے۔
²⁰ آپ نے مَوشہ اَور اَہرونؔ کے ذریعہ
گلّہ کی مانند اَپنے لوگوں کی رہبری کی۔

(Biblica® آزادانہ اردو ہم عصر ترجمہ™)