تیسری کِتاب
زبُور 73‏–89
زبُور 73
آسفؔ کا زبُور۔
¹ بے شک خُدا اِسرائیل پر،
یعنی پاک دِل والوں پر مہربان ہیں۔
² لیکن میرے پاؤں پھسلنے ہی والے تھے؛
میرے قدموں کے نیچے کی زمین گویا کھسکنے کو تھی۔
³ کیونکہ جَب مَیں بدکار لوگوں کی خُوشحالی دیکھتا تھا
تو مُجھے مغروُروں پر رشک آتا تھا۔
⁴ وہ کسی قِسم کی کشمش میں مُبتلا نہیں ہوتے؛
اَور اُن کے جِسم تندرست اَور طاقتور ہوتے ہیں۔
⁵ وہ اُن تکلیفوں سے بَری ہوتے ہیں جو عام آدمی اُٹھاتا ہے؛
اَور اُن پر اِنسانی آفتیں نازل نہیں ہوتیں۔
⁶ اِس لیٔے غُرور اُن کے گلے کا ہار بَن جاتا ہے؛
اَور وہ ظُلم سے مُلبّس ہو جاتے ہیں۔
⁷ اُن کی آنکھیں چربی سے پھُولی ہُوئی ہوتی ہیں؛
اَور اُن کے بُرے تصوّرات کی کویٔی حَد نہیں ہوتی۔
⁸ وہ ٹھٹّا مارتے ہیں اَور دُشمنی کی باتیں کرتے ہیں؛
اَور ضِد میں آکر ظُلم و سِتم کی دھمکیاں دیتے ہیں۔
⁹ اُن کے مُنہ آسمان سے باتیں کرتے ہیں،
اَور اُن کی زبانیں زمین پر قبضہ جتاتی ہیں۔
¹⁰ اِس لیٔے خُدا کے لوگ اُن کی طرف رُجُوع ہوتے ہیں
اَور جی بھر کر پانی پیتے ہیں۔
¹¹ بدکار لوگ کہتے ہیں: ”خُدا کو کیسے مَعلُوم ہوگا؟
کیا خُداتعالیٰ کو کچھ علم ہے؟“
¹² بدکار لوگ اَیسے ہی ہوتے ہیں۔
وہ ہمیشہ بے فکری سے دولت جمع کرنے میں لگے رہتے ہیں۔
¹³ مَیں نے تو خوامخواہ اَپنے دِل کو صَاف رکھا؛
اَور خوامخواہ اَپنے ہاتھ بےگُناہ رکھے۔
¹⁴ میں دِن بھر آفت میں مُبتلا رہا؛
اَور ہر صُبح سزا پاتا رہا۔
¹⁵ اگر مَیں کہتا کہ یُوں کہُوں گا
تو مَیں آپ کے فرزندوں کی پُشت کے ساتھ بےوفائی کرتا۔
¹⁶ جَب مَیں نے یہ سَب سمجھنے کی کوشش کی،
تو یہ میرے لیٔے دشوار ثابت ہُوا
¹⁷ یہاں تک کہ میں خُدا کے مَقدِس میں داخل ہُوا؛
تَب کہیں میں اُن بدکاروں کا اَنجام سمجھ سَکا۔
¹⁸ یقیناً آپ نے اُنہیں پھسلنی جگہوں میں رکھا ہے؛
اَور اُنہیں گرا کر تباہ کر دیتاہے۔
¹⁹ اَچانک ہی وہ کیسے تباہ ہو گئے،
اَور دہشت کے باعث بالکُل فنا ہو گئے!
²⁰ جِس طرح کویٔی جاگ اُٹھنے کے بعد
خواب کو وہم قرار دیتاہے،
اَے خُداوؔند، وَیسے ہی جَب آپ اُٹھیں گے،
تو اُن کی صورتیں حقیر جانی جایٔیں گی۔
²¹ جَب میرا دِل رنجیدہ ہُوا
اَور میرا جگر چھِد گیا،
²² میں اَپنے ہوش کھو بیٹھا اَور جاہل تھا؛
مَیں آپ کے سامنے وحشی کی مانند تھا۔
²³ تو بھی میں ہمیشہ آپ کے ساتھ رہُوں گا؛
آپ میرا داہنا ہاتھ پکڑکر مُجھے تھامتے ہیں۔
²⁴ آپ اَپنی مصلحت سے میری رہنمائی کرتے ہیں،
اَور تَب آخِرکار مُجھے اَپنے جلال میں قبُول فرمائیں گے۔
²⁵ آسمان پر آپ کے سِوا میرا کون ہے؟
اَور زمین پر آپ کے سِوا میں کسی کا مُشتاق نہیں۔
²⁶ خواہ میرا جِسم اَور میرا دِل جَواب دے دیں،
تو بھی خُدا ہمیشہ میرے دِل کی قُوّت
اَور میرا بَخرہ ہیں۔
²⁷ جو آپ سے دُور رہتے ہیں وہ فنا ہو جایٔیں گے؛
اَورجو آپ سے بےوفائی کرتے ہیں اُن سَب کو آپ ہلاک کر دیتے ہیں۔
²⁸ لیکن میرے لیٔے یہی بہتر ہے کہ میں خُدا کی قربت میں رہُوں،
مَیں نے یَاہوِہ قادر کو اَپنی پناہ گاہ بنا لیا ہے؛
مَیں آپ کے سَب کاموں کا بَیان کروں گا۔

(Biblica® آزادانہ اردو ہم عصر ترجمہ™)