موسیقی ہدایت کار کے لیٔے ”دُور بلُوطوں پر فاختہ یا کبُوتری“ کے سُرپر مَبنی داویؔد کا زبُور۔ مِکتام‏ جَب فلسطینیوں نے اُنہیں گاتؔھ میں گرفتار کیا ہُوا تھا۔
¹ اَے خُدا، مُجھ پر رحم کریں کیونکہ لوگ شِدّت سے میرا تعاقب کرتے ہیں؛
وہ دِن بھر اَپنا حملہ جاری رکھتے ہیں۔
² میرے دُشمن دِن بھر میرا تعاقب کرتے ہیں؛
اَیسے مغروُر لڑنے والوں کی تعداد بہت زِیادہ ہے۔
³ جَب مُجھ پر دہشت طاری ہوگی، تو مَیں آپ پر توکّل کروں گا۔
⁴ اُس خُدا پر جِس کا وعدہ میرے لیٔے باعثِ تعریف ہے،
اُسی خُدا پر میں توکّل کرتا ہُوں اِس لیٔے مُجھے دہشت نہ ہوگی۔
فانی اِنسان میرا کیا بِگاڑ سَکتا ہے؟
⁵ دِن بھر وہ میری باتوں کو توڑ مروڑ کر پیش کرتے ہیں؛
وہ ہمیشہ مُجھے نُقصان پہُنچانے کے درپے رہتے ہیں۔
⁶ وہ ساز باز کرکے میری گھات میں بیٹھتے ہیں،
اَور میرے ہر قدم پر نگاہ رکھتے ہیں،
کیونکہ وہ میری جان کے خواہاں ہیں۔
⁷ اُن کی بدکاری سے اُنہیں ہرگز بچ کر نکلنے نہ دینا؛
اَے خُدا، اَپنے قہر میں اُمّتوں کو زوال سے دوچار کریں۔
⁸ میرے نالوں کو لِکھ لے؛
میرے آنسُوؤں کو اَپنے طُومار میں درج کر لیں۔
کیا آپ اُن کا حِساب نہیں رکھتے؟
⁹ جَب مَیں مدد کے لیٔے آپ کو پُکاروں گا
تو میرے دُشمن پسپا ہو جایٔیں گے۔
تَب میں جان لُوں گا کہ خُدا میری طرف ہیں۔
¹⁰ خُدا کا وعدہ میرے لیٔے باعثِ فخر ہے،
میں یَاہوِہ کے کلام کی تعریف کرتا ہُوں۔
¹¹ اِسی خُدا پر میرا توکّل ہے اِس لیٔے میں نہ ڈروں گا،
اِنسان میرا کیا بِگاڑ سَکتا ہے؟
¹² اَے خُدا، مَیں نے آپ کی مَنّتیں مانی ہیں؛
میں اَپنی شُکر گُزاری کے نذرانے آپ کے حُضُور پیش کروں گا۔
¹³ کیونکہ آپ نے میری جان کو موت سے میری حِفاظت کی،
اَور میرے پاؤں کو پھسلنے سے بچایا ہے،
تاکہ میں خُدا کے سامنے
زندگی کے نُور میں چلُوں۔

(Biblica® آزادانہ اردو ہم عصر ترجمہ™)