داویؔد کا زبُور۔ ایک عرضداشت۔
¹ اَے یَاہوِہ، آپ مُجھے اَپنے قہر میں ملامت نہ کریں
اَور نہ اَپنے غضب میں مُجھے تنبیہ کریں۔
² کیونکہ آپ کے تیروں نے مُجھے چھید ڈالا ہے،
اَور آپ کا ہاتھ مُجھ پر آ پڑا ہے۔
³ آپ کے قہر کے باعث میرے جِسم میں توانائی نہیں؛
اَور میرے گُناہ کے باعث میری ہڈّیاں سالِم نہیں۔
⁴ میری بدی میرے لیٔے
ناقابل برداشت بوجھ بَن کر رہ گئی ہے۔
⁵ میری گُناہ آلُودہ حماقت کے باعث
میرے زخم سڑ گیٔے اَور اُن میں بدبُو پیدا ہو گئی ہے۔
⁶ میں کُبڑا ہوکر زمین سے جا لگا ہُوں؛
میں دِن بھر ماتم کرتا رہتا ہُوں۔
⁷ میری کمر میں شدید درد ہے؛
اَور میرے جِسم میں ذرا بھی صحت نہیں۔
⁸ میری نقاہت بڑھ گئی ہے اَور مَیں نہایت کُچلا ہُوا ہُوں؛
اَور دِل کی بےچینی کے باعث کراہتا رہتا ہُوں۔
⁹ اَے خُداوؔند، میری تمام تمنّاؤں کا دفتر آپ کے سامنے کھُلا پڑا ہے؛
اَور میری آہیں آپ سے پوشیدہ نہیں ہیں۔
¹⁰ میرا دِل دھڑکتا ہے اَور میری قُوّت گھٹتی جا رہی ہے؛
اَور میری آنکھوں کی رَوشنی چلی گئی ہے۔
¹¹ میرے زخموں کے باعث میرے عزیزو اقارب مُجھ سے گُریز کرنے لگے ہیں؛
اَور میرے ہمسایے دُور رہتے ہیں۔
¹² جو میری جان کے خواہاں ہیں وہ اَپنے جال بچھاتے ہیں،
جو مُجھے نُقصان پہُنچانا چاہتے ہیں وہ میری بربادی کی باتیں کرتے ہیں؛
اَور دِن بھر مکر و فریب کے منصُوبے باندھتے ہیں۔
¹³ میں ایک بہرے اِنسان کی مانند ہُوں جو سُن ہی نہیں سَکتا،
ایک گُونگے کی مانند جو اَپنا مُنہ نہیں کھولتا؛
¹⁴ میں اُس آدمی کی طرح ہُوں جسے سُنایٔی نہیں دیتا،
اَور جِس کا مُنہ جَواب نہیں دے سَکتا۔
¹⁵ اَے یَاہوِہ، مَیں آپ پر آس لگائے بیٹھا ہُوں؛
اَے خُداوؔند، میرے خُدا! آپ جَواب دیں گے۔
¹⁶ کیونکہ مَیں نے کہا: ”کہیں وہ مُجھ پر شادیانہ نہ بجائیں
یا جَب میرا پاؤں پھسلے تو میرے خِلاف تکبُّر نہ کریں۔“
¹⁷ کیونکہ مَیں گرنے کو ہُوں،
اَور میرا درد برابر میرے ساتھ لگا ہُواہے۔
¹⁸ میں اَپنی بدکاری کا خُدا سے اقرار کرتا ہُوں؛
اَور مَیں اَپنے گُناہ کے باعث پریشان ہُوں۔
¹⁹ اَیسے بہت ہیں جو میرے سخت دُشمن ہیں؛
اَور مُجھ سے بلاوجہ نفرت کرنے والے بھی تعداد میں بہت ہو گئے ہیں۔
²⁰ وہ میری نیکی کا بدلہ بدی سے دیتے ہیں
اَور جَب مَیں نیکی کی پیروی کرتا ہُوں تو بہتان تراشی کرتے ہیں۔
²¹ اَے یَاہوِہ، مُجھے ترک نہ کریں؛
اَے میرے خُدا! مُجھ سے دُور نہ ہو۔
²² اَے میرے مُنجّی خُداوؔند،
میری مدد کے لیٔے جلد آئیں۔