داویؔد کا زبُور۔
¹ اَے یَاہوِہ، میرا اِنصاف کریں،
کیونکہ مَیں نے پاک زندگی گزاری ہے؛
مَیں نے پس و پیش کئے بغیر
یَاہوِہ پر توکّل کیا ہے۔
² اَے یَاہوِہ، مُجھے جانچیں اَور آزمائیں،
میرے دِل اَور دماغ کو پرکھیں؛
³ کیونکہ آپ کی لافانی مَحَبّت ہمیشہ میرے سامنے ہے،
اَور مَیں مسلسل آپ کی سچّائی کی راہ پر گامزن ہُوں۔
⁴ میں دغابازوں کی صحبت میں نہیں بیٹھتا،
اَور نہ ریاکاروں کے ہمراہ چلتا ہُوں؛
⁵ بدکاروں کی محفل سے مُجھے نفرت ہے
اَور بدکار لوگوں کے ساتھ بیٹھنے سے دُور بھاگتا ہُوں۔
⁶ میں اَپنے ہاتھ دھوکر اَپنی بےگُناہی ثابت کروں گا،
اَے یَاہوِہ، اَور تَب آپ کے مذبح کا طواف کروں گا،
⁷ تاکہ بُلند آواز سے آپ کی سِتائش کروں
اَور آپ کے سَب عجِیب کارناموں کو بَیان کروں۔
⁸ اَے یَاہوِہ، مَیں آپ کی قِیام گاہ،
اَور آپ کی جلالی بارگاہ کو عزیز رکھتا ہُوں۔
⁹ آپ میری جان کو اُن گُنہگاروں کے ساتھ،
اَور میری زندگی کو اُن خُونخواروں کے ساتھ نہ لیں،
¹⁰ جِن کے ہاتھوں میں بُرے منصُوبے ہیں،
اَور جِن کے داہنے ہاتھ رشوتوں سے بھرے ہُوئے ہیں۔
¹¹ لیکن مَیں بے عیب زندگی گزارتا ہُوں؛
مُجھے چھُڑا لیں اَور مُجھ پر رحم فرمائیں۔
¹² میرے پاؤں ہموار جگہ پر قائِم رہتے ہیں؛
میں بڑے مجمع میں یَاہوِہ کی سِتائش کروں گا۔