داویؔد کا زبُور۔ برائے موسیقی ہدایت کار۔
¹ اَے یَاہوِہ، آپ کی قُوّت سے بادشاہ خُوش ہوتاہے،
آپ کی بخشی ہُوئی نَجات کے باعث اُس کی خُوشی کس قدر بڑھ جاتی ہے!
² آپ نے اُس کے دِل کی تمنّا پُوری کی ہے،
اَور اُس کے لبوں کی اِلتجا کو ردّ نہ کیا۔
³ آپ نے بیش قیمتی برکتوں کے ساتھ اُس کا اِستِقبال کیا
اَور خالص سونے کا تاج اُس کے سَر پر رکھا۔
⁴ اُس نے آپ سے زندگی طلب کی اَور آپ نے اُسے وہ بخشی۔
بَلکہ ہمیشہ کے لیٔے عمر کی درازی بخشی۔
⁵ آپ کی دی ہُوئی فتوحات کے باعث اُس کا جلال عظیم ہو گیا؛
آپ نے اُسے شان و شوکت سے نوازا ہے۔
⁶ یقیناً آپ نے اُسے اَبدی برکتیں بخشی ہیں
اَور اَپنی حُضُوری کی خُوشی سے اُسے شادمان کیا ہے۔
⁷ کیونکہ بادشاہ کا توکّل یَاہوِہ پر ہے؛
اَور خُداتعالیٰ کی لافانی مَحَبّت کے باعث
وہ ڈگمگانے نہ پایٔےگا۔
⁸ آپ کا ہاتھ آپ کے سارے دُشمنوں کو پکڑ لے گا؛
آپ کا داہنا ہاتھ آپ کے حریفوں کو گرفتار کر لے گا۔
⁹ جَب آپ ظاہر ہوں گے
تو اُنہیں جلتے ہُوئے تنور کی مانند کر دیں گے۔
اَپنے غضب میں یَاہوِہ اُنہیں نگل جائیں گے،
اَور اُن کی آگ اُنہیں بھسم کر ڈالے گی۔
¹⁰ آپ اُن کی اَولاد کو رُوئے زمین پر سے،
اَور اُن کی نَسل کو بنی آدمؔ میں سے نابود کر دیں گے۔
¹¹ حالانکہ وہ آپ کے خِلاف بدی کرنا چاہتے ہیں
اَور شرارت آمیز منصُوبے بناتے ہیں، تو بھی وہ کامیاب نہیں ہو سکتے؛
¹² کیونکہ جَب آپ اُن پر اَپنی کمان کھینچیں گے
تَب آپ اُنہیں پیٹھ دِکھانے پر مجبُور کر دیں گے۔
¹³ اَے یَاہوِہ، اَپنی قُوّت میں سرفراز ہو؛
ہم آپ کی قُدرت کی تعریف میں نغمہ گائیں گے۔