موسیقی ہدایت کار کے لیٔے، موتھ لبّین والی دھُن پر مَبنی، داویؔد کا زبُور۔
¹ اَے یَاہوِہ، میں اَپنے پُورے دِل سے آپ کی تمجید کروں گا؛
اَور آپ کے تمام عجِیب کارناموں کا ذِکر کروں گا۔
² مَیں آپ سے خُوش اَور مسرُور رہُوں گا؛
اَور اَے خُداتعالیٰ، مَیں آپ کے نام کی مدح سرائی کروں گا۔
³ جَب میرے دُشمن پیچھے ہٹتے ہیں؛
وہ آپ کی حُضُوری کے سبب سے ٹھوکر کھا کر ہلاک ہو جاتے ہیں۔
⁴ کیونکہ آپ نے میرے حق کی اَور میرے مُقدّمہ کی تائید کی ہے؛
اَور اَپنے تخت پر جلوہ افروز ہوکر راستی سے میری عدالت کی ہے۔
⁵ آپ نے غَیر قوموں کو جِھڑکا اَور بدکاروں کو تباہ کیا ہے؛
اَور اُن کا نام اَبد تک کے لیٔے مٹا دیا ہے۔
⁶ دائمی تباہی نے میرے دُشمنوں کو آ پکڑا ہے،
آپ نے اُن کے شہروں کو مُستقِل کھنڈر بنا ڈالا؛
یہاں تک کہ اُن کی یادگار تک باقی نہ رہی۔
⁷ لیکن یَاہوِہ اَبد تک تخت نشین رہے گا؛
اُنہُوں نے اِنصاف کے لیٔے اَپنا تخت قائِم کیا ہے۔
⁸ وہ دُنیا پر حُکمرانی؛
اَور قوموں کا اِنصاف راستبازی سے کریں گے۔
⁹ یَاہوِہ مظلوموں کے لیٔے پناہ،
اَور مُصیبت کے ایّام میں قلعہ ہے۔
¹⁰ جو آپ کا نام جانتے ہیں، آپ پر توکّل کریں گے،
اَے یَاہوِہ، کیونکہ جنہوں نے آپ سے دعا کی،
آپ نے اَپنے طالبوں کو کبھی نہیں چھوڑا۔
¹¹ یَاہوِہ کی سِتائش کرو، جو صِیّونؔ میں تخت نشین ہے؛
اَور قوموں کے درمیان اُس کے کارناموں کا اعلان کرو۔
¹² کیونکہ خُون کا اِنتقام لینے والا، اُن کو یاد رکھتا ہے؛
اَور وہ مُصیبت زدوں کی فریاد کو نظرانداز نہیں کرتا۔
¹³ اَے یَاہوِہ، مُجھ پر نظرِکرم! دیکھ کہ میرے دُشمن مُجھے کیسا دُکھ دیتے ہیں،
آپ ہی ہیں، جو مُجھے موت کے پھاٹکوں کے پاس سے اُٹھاتے ہیں،
¹⁴ تاکہ میں صِیّونؔ کی بیٹی کے
پھاٹکوں کے پاس آپ کی سِتائش کر سکوں،
اَور وہاں آپ کی دی ہُوئی نَجات سے خُوش ہوؤں۔
¹⁵ قومیں اَپنے ہی کھودے ہُوئے، گڑھے میں گِر چُکی ہیں؛
اَورجو جال اُنہُوں نے بچھایا تھا اُسی میں اُن کے پاؤں اُلجھ گیٔے ہیں۔
¹⁶ یَاہوِہ نے خُود کو ظاہر کر دیا، اُنہُوں نے اِنصاف کیا ہے؛
اَور بدکار لوگ اَپنے ہاتھوں کے کاموں میں پھنس جاتے ہیں۔
¹⁷ بدکار لوگ عالمِ اسفل میں اُتر جاتے ہیں، اَور وہ سَب قومیں بھی،
جو خُدا کو بھُول جاتی ہیں۔
¹⁸ لیکن مسکین ہمیشہ کے لیٔے بھُلائے نہ جایٔیں گے؛
اَور نہ مُصیبت زدوں کی اُمّید کبھی ٹوٹے گی۔
¹⁹ اَے یَاہوِہ، اُٹھیں، اِنسان غالب نہ ہونے پایٔے؛
اَور قوموں کی عدالت آپ ہی کے سامنے کی جائے۔
²⁰ اَے یَاہوِہ! آپ اُنہیں خوف دِلائیں؛
اَور قومیں جان لیں کہ وہ محض بشر ہی ہیں۔