آسفؔ کا مشکیل۔‏
¹ اَے میری اُمّت! میری تعلیم سُنو؛
میرے مُنہ کے کلام پر کان لگاؤ۔
² میں تمثیلوں کے لیٔے اَپنا مُنہ کھولوں گا،
میں قدیم زمانہ کی پوشیدہ باتیں بتاؤں گا۔
³ جنہیں ہم نے سُنا اَور جان لیا،
اَور جنہیں ہمارے آباؤاَجداد نے ہمیں بتایا۔
⁴ ہم اُنہیں اُن کی اَولاد سے پوشیدہ نہ رکھیں گے؛
بَلکہ آنے والی نَسل کو
یَاہوِہ کے قابل تعریف کارناموں،
اُن کی قُدرت اَور اُن کے کئے ہُوئے عجِیب کارناموں
کے متعلّق سَب کچھ بتا دیں گے۔
⁵ اُنہُوں نے یعقوب میں قوانین کی گواہی قائِم کی
اَور اِسرائیل میں شَریعت مُقرّر کی،
جِن کے متعلّق ہمارے آباؤاَجداد کو حُکم دیا
کہ وہ اَپنی اَولاد کو اُن کی تعلیم دیں،
⁶ لہٰذا اگلی پُشت اُنہیں جانے گی،
اَور وہ فرزند بھی جانیں گے جو ابھی پیدا ہونے والے ہیں،
اَور وہ اُنہیں اَپنی اَولاد کو بتائیں گے۔
⁷ تَب وہ خُدا پر ایمان لائیں گے
اَور اُن کے کارناموں کو فراموش نہ کریں گے،
بَلکہ اُن کے اَحکام پر عَمل کریں گے۔
⁸ وہ اَپنے آباؤاَجداد کی مانند نہ ہوں گے۔
جو ایک ضِدّی اَور باغی پُشت ہے،
جِن کا دِل ہی خُدا کا وفادار نہ رہا،
اَور نہ اُن کی رُوح۔
⁹ اِفرائیمؔ کے سپاہیوں نے کمانوں سے مُسلّح ہوتے ہُوئے بھی،
لڑائی کے دِن پیٹھ دِکھا دی؛
¹⁰ اُنہُوں نے خُدا کے عہد کو قائِم نہ رکھا
اَور اُن کے آئین پر چلنے سے اِنکار کیا۔
¹¹ اُنہُوں نے اُن کے حیرت اَنگیز کاموں کو،
جو اُنہیں دِکھائے گیٔے تھے، فراموش کر دیا۔
¹² اُنہُوں نے اُن کے آباؤاَجداد کی نگاہوں کے سامنے
مُلک مِصر اَور ضعنؔ کے علاقے میں عجِیب و غریب کارنامے کئے۔
¹³ اُنہُوں نے سمُندر کے دو حِصّے کئے اَور اُنہیں پار اُتارا؛
اَور پانی کو دیوار کی مانند کھڑا کر دیا۔
¹⁴ اُنہُوں نے دِن کے وقت بادل کے ذریعہ
اَور رات کو آگ کی رَوشنی سے اُن کی رہنمائی کی۔
¹⁵ اُنہُوں نے بیابان میں چٹّانوں کو چاک کیا
اَور اُنہیں سمُندر کی طرح بہتات سے پانی دیا۔
¹⁶ اُنہُوں نے چٹّان والی گھاٹی میں ندیاں جاری کیں
اَور دریاؤں کی طرح پانی بہایا۔
¹⁷ لیکن عِبرانی لوگ اُن کے خِلاف گُناہ کرتے ہی گیٔے،
اَور بیابان میں خُداتعالیٰ سے بغاوت کرتے رہے۔
¹⁸ اُنہُوں نے اَپنی پسند کی خُوراک مانگ کر
جان بوجھ کر خُدا کو آزمایا۔
¹⁹ اُنہُوں نے یہ کہتے ہُوئے خُدا کے خِلاف بدگوئی کی؛
کیا خُدا، ”بیابان میں دسترخوان بچھانے پر قادر ہے؟
²⁰ جَب اُنہُوں نے چٹّان کو مارا
تو پانی پھوٹ نِکلا،
اَور ندیاں کثرت سے بہہ نکلیں۔
لیکن کیا وہ ہمیں روٹی بھی دے سکتے ہیں؟
کیا وہ اَپنے لوگوں کے لیٔے گوشت مہیا کر سکتے ہیں؟“
²¹ جَب یَاہوِہ نے اُن کی باتیں سُنیں تو وہ نہایت غضبناک ہُوئے؛
لہٰذا یعقوب کے خِلاف اُن کے غُصّہ کی آگ بھڑک اُٹھی،
اَور اِسرائیل پر اُن کا قہر ٹوٹ پڑا،
²² کیونکہ وہ خُدا پر ایمان نہ لایٔے
اَور اُن کی نَجات پر بھروسا نہ کیا۔
²³ تو بھی اُنہُوں نے اُوپر افلاک کو حُکم دیا
اَور آسمان کے دروازے کھول دئیے؛
²⁴ اُنہُوں نے اُمّت کے کھانے کے لیٔے مَنّا برسایا،
اَور اُنہیں آسمانی خُوراک عنایت فرمائی۔
²⁵ اِنسانوں نے فرشتوں کی غِذا کھائی؛
اَور جِتنی رسد اُنہیں درکار تھی اُتنی بھیج دی۔
²⁶ اُنہُوں نے آسمان میں مشرقی ہَوا چلائی
اَور اَپنی قُدرت سے جُنوبی ہَوا چلائی۔
²⁷ اُنہُوں نے خاک کی مانند اُن پر گوشت برسایا،
اَور سمُندر کے کنارے کی ریت کی طرح بے شُمار پرندے بھیجے۔
²⁸ خُدا نے اُنہیں اُن کی قِیام گاہ میں،
اَور اُن کے خیموں کے اطراف گرا دیا۔
²⁹ اُنہُوں نے جی بھرکے کھایا،
کیونکہ اُنہُوں نے اُن کی دِلی تمنّا پُوری کی تھی۔
³⁰ لیکن اِس سے پہلے کہ اُن کا دِل اِس غِذا سے بھرجاتا جِس کے لیٔے وہ ترستے تھے،
اَور ابھی وہ اُن کے مُنہ میں ہی تھی،
³¹ خُدا کا قہر اُن پر بھڑک اُٹھا؛
اَور خُدا نے اُن کے موٹے اَور بھاری بھر کم لوگوں کو موت کے گھاٹ اُتار دیا،
اَور اِسرائیلی جَوانوں کو مار گرایا۔
³² اِس کے باوُجُود وہ گُناہ کرتے رہے؛
اَور اُن کے معجزوں کے باوُجُود وہ ایمان نہ لایٔے۔
³³ اِس لیٔے خُدا نے اُن کے دِنوں کو رائگاں کر دیا
اَور اُن کے سالوں کو دہشت میں گزر جانے دیا۔
³⁴ جَب کبھی خُدا اُنہیں قتل کرتے، وہ خُدا کے طالب ہوتے؛
اَور دِل و جان سے دوبارہ اُن کی طرف رُجُوع کرتے۔
³⁵ اَور اُنہیں یاد آتا کہ خُدا اُن کی چٹّان ہیں،
اَور خُداتعالیٰ اُن کے نَجات دِہندہ ہیں۔
³⁶ لیکن تَب وہ اَپنے مُنہ سے اُن کی جھُوٹی خُوشامد کرتے،
اَور اَپنی زبان سے اُن سے جھُوٹ بولتے؛
³⁷ اُن کے دِل میں اُن کے لیٔے خُلوص نہ تھا،
اَور نہ وہ اُن کے عہد ہی کے وفادار نکلے۔
³⁸ تو بھی خُدا نے رحم کیا،
خُدا نے اُن کی بدکاریاں بخش دیں
اَور اُنہیں ہلاک نہیں کیا۔
بارہا خُدا نے اَپنے قہر کو روکا
اَور اَپنے غضب کو پُورے طور پر بھڑکنے نہ دیا۔
³⁹ خُدا کو یاد تھا کہ وہ محض بشر ہیں،
اَور ہَوا کا جھونکا جو واپس نہیں آتا۔
⁴⁰ کتنی بار ویرانہ میں اُنہُوں نے خُدا سے بغاوت کی
اَور صحرا میں اُنہیں آزردہ کیا!
⁴¹ اُنہُوں نے بار بار خُدا کو آزمایا؛
اَور اِسرائیل کے مُقدّس خُدا کو رنج پہُنچایا۔
⁴² اُنہُوں نے خُدا کی قُدرت کو یاد نہ کیا۔
نہ اُس دِن کو جَب خُدا نے فدیہ دے کر اُنہیں ظالِم سے نَجات دِلائی تھی،
⁴³ اَور اُس دِن کو جَب خُدا نے مِصر میں اَپنے معجزانہ نِشان،
اَور ضعنؔ کے علاقہ میں اَپنے کارنامے دِکھائے تھے۔
⁴⁴ خُدا نے مِصریوں کی ندیوں کو خُون بنا دیا؛
اَور وہ اَپنے دریاؤں سے پی نہ سکے۔
⁴⁵ اُنہُوں نے مکھّیوں کے غول بھیجے جو اُنہیں کھاگئے،
اَور مینڈک جنہوں نے اُنہیں تباہ کر دیا۔
⁴⁶ خُدا نے اُن کی فصل کے کیڑوں کو،
اَور اُن کی پیداوار ٹِڈّیوں کو دے دی۔
⁴⁷ خُدا نے اُن کی انگور کی بَیلوں کو اولے سے
اَور اُن کے گُولر کے درختوں کو پالے سے تباہ کر دیا۔
⁴⁸ اُنہُوں نے اُن کے گھریلو گائے بَیلوں کو اولوں کے حوالہ کیا،
اَور اُن کی گھریلو بھیڑ بکریوں کو بجلی کے ذریعہ۔
⁴⁹ خُدا نے اَپنے غیظ و غضب، طیش اَور عداوت۔
یعنی ہلاکت کے فرشتوں کا لشکر بھیج کر،
اَپنا شدید قہر اُن پر نازل کیا۔
⁵⁰ اُنہُوں نے اَپنے قہر کے لیٔے راستہ بنایا؛
اَور اُنہیں موت سے نہیں بچایا
بَلکہ اُنہیں وَبا کے حوالہ کر دیا۔
⁵¹ اُنہُوں نے مِصر کے سَب پہلوٹھوں کو،
یعنی حامؔ کے خیمہ میں اُن کی قُوّتِ مَردی کے پہلے پھل کو مار ڈالا۔
⁵² لیکن وہ اَپنے لوگوں کو گلّہ کی مانند نکال لائے؛
اَور بیابان میں اُن کی بھیڑوں کی طرح رہنمائی کی۔
⁵³ وہ اُنہیں سلامتی سے لے گئے اِس لیٔے وہ ڈرے نہیں؛
لیکن اُن کے دُشمنوں کو سمُندر نے ہڑپ کر لیا۔
⁵⁴ اِس طرح وہ اُنہیں اَپنے مُقدّس مُلک کی سرحد تک لے آئے،
یعنی اُس کوہستانی مُلک تک جسے اُن کے داہنے ہاتھ نے حاصل کیا تھا۔
⁵⁵ اُنہُوں نے دُوسری قوموں کو اُن کے سامنے سے نکال دیا
اَور اُن کی زمین اُنہیں مِیراث جریب کے طور پر بانٹ دی؛
اَور اِسرائیلی قبیلوں کو اُن کے خیموں میں بسا دیا۔
⁵⁶ لیکن اُنہُوں نے خُدا کو آزمایا،
اَور خُداتعالیٰ سے بغاوت کی؛
اَور اُن کے قوانین کو نہ مانا۔
⁵⁷ اَور اَپنے آباؤاَجداد کی طرح بےوفا اَور بےایمان نکلے؛
اَور ایک ناقص کمان کی مانند پلٹ گیٔے۔
⁵⁸ اُنہُوں نے اَپنے معبُودوں کے لیٔے مذبحے بنانے کے باعث اُنہیں غُصّہ دِلایا؛
اَور اَپنے بُتوں سے اُنہیں غیرت دِلائی۔
⁵⁹ جَب خُدا نے اُن کی باتیں سُنیں تو وہ نہایت غضبناک ہُوئے؛
اَور اِسرائیل سے متنفّر ہو گئے۔
⁶⁰ اُنہُوں نے شیلوہؔ کے خیمہ اِجتماع کو ترک کر دیا،
یعنی اُس خیمہ کو جو اُنہُوں نے بنی آدمؔ کے درمیان کھڑا کیا تھا۔
⁶¹ اُنہُوں نے اَپنی قُوّت کے صندُوق کو اسیری میں،
اَور اَپنی شوکت کو دُشمن کے ہاتھ میں جانے دیا۔
⁶² اُنہُوں نے اَپنے لوگوں کو تلوار کے حوالہ کر دیا؛
اَور وہ اَپنی مِیراث سے نہایت غضبناک ہو گئے۔
⁶³ آگ اُن کے جَوانوں کو کھا گئی،
اَور اُن کی کنواریوں کے لیٔے نغماتِ عروسی نہ گائے گیٔے؛
⁶⁴ اُن کے کاہِنؔ تلوار سے مارے گیٔے،
اَور اُن کی بیوائیں ماتم تک نہ کر سکیں۔
⁶⁵ تَب خُداوؔند گویا نیند سے جاگ اُٹھے،
جَیسے ایک آدمی انگوری شِیرہ کی مخموری سے جاگ اُٹھتا ہے۔
⁶⁶ اُنہُوں نے اَپنے دُشمنوں کو مار کر پسپا کر دیا؛
اَور اُنہیں ہمیشہ کے لیٔے رُسوا کیا۔
⁶⁷ پھر خُدا نے یُوسیفؔ کے خیموں کو ردّ کر دیا،
اُنہُوں نے اِفرائیمؔ کے قبیلہ کو نہ چُنا؛
⁶⁸ بَلکہ یہُوداہؔ کے قبیلہ کو چُنا،
یعنی کوہِ صِیّونؔ کو جسے وہ پسند کرتے تھے۔
⁶⁹ خُدا نے اَپنے پاک مَقدِس کو آسمانوں کی مانند بہت اُونچا تعمیر کیا،
اَور زمین کی مانند بنایا جسے اُنہُوں نے ہمیشہ کے لیٔے قائِم کیا۔
⁷⁰ اُنہُوں نے اَپنے خادِم داویؔد کو چُنا
اَور اُنہیں بھیڑ کے گلّہ میں سے لے لیا؛
⁷¹ وہ اُنہیں بھیڑوں کی گلّہ بانی کرنے سے ہٹا لائے
تاکہ وہ اُن کی قوم یعقوب،
اَور اُن کی مِیراث اِسرائیل کی گلّہ بانی کریں۔
⁷² اَور داویؔد خُلوص دِل سے اُن کی پاسبانی؛
اَور اَپنے ماہر ہاتھوں سے اُن کی رہنمائی کرتے رہے۔

(Biblica® آزادانہ اردو ہم عصر ترجمہ™)