موسیقی ہدایت کار کے لیٔے۔ بنی قورحؔ کی تصنیف۔ علاموت‏ کے سُرپر مَبنی ایک نغمہ۔
¹ خُدا ہماری پناہ اَور قُوّت ہیں،
مُصیبت میں مُستعد مددگار
² اِس لیٔے ہمیں کویٔی خوف نہیں خواہ زمین اُلٹ جائے
اَور پہاڑ سمُندر کی تہہ میں جا گریں۔
³ خواہ اُس کا پانی شور مچائے اَور موجزن ہو جائے
اَور پہاڑ اُس کے تلاطم سے لرزنے لگیں۔
⁴ ایک دریا ہے جِس کی نہریں خُدا کے شہر کو،
یعنی اُس پاک مقام کو جہاں خُداتعالیٰ کا مَسکن ہے شاداب کرتی ہیں۔
⁵ خُدا اُس شہر میں ہے، اُنہیں کبھی جنبش نہ ہوگی؛
صُبح سویرے خُدا اُن کی مدد کریں گے۔
⁶ قومیں اضطراب میں مُبتلا ہیں اَور سلطنتوں میں انقلاب آ گیا؛
وہ اَپنی آواز بُلند کرتے ہیں اَور زمین پگھل جاتی ہے۔
⁷ قادرمُطلق یَاہوِہ ہمارے ساتھ ہیں؛
یعقوب کا خُدا ہمارا قلعہ ہیں۔
⁸ آؤ اَور یَاہوِہ کے کاموں پر نظر ڈالو،
کہ اُنہُوں نے زمین پر کیسی کیسی ویرانیاں برپا کی ہیں۔
⁹ وہ زمین کی اِنتہا تک لڑائیاں موقُوف کراتے ہیں؛
وہ کمان توڑتے اَور نیزے کے ٹکڑے کر ڈالتے ہیں،
اَور رتھوں کو آگ سے جَلا دیتے ہیں۔
¹⁰ خُدا نے فرمایا، ”خاموش ہو جاؤ اَور جان لو کہ میں خُدا ہُوں؛
میں قوموں کے درمیان سرفراز ہوں گا،
میں زمین پر سرفراز ہوں گا۔“
¹¹ قادرمُطلق یَاہوِہ ہمارے ساتھ ہیں؛
یعقوب کا خُدا ہمارا قلعہ ہیں۔