داویؔد کا زبُور۔
¹ بدکرداروں کے باعث پریشان نہ ہو،
اَور خطاکاروں پر رشک نہ کرو۔
² کیونکہ وہ گھاس کی مانند جلد مُرجھا جایٔیں گے،
اَور سبز پَودوں کی طرح جلد پژمردہ ہو جایٔیں گے۔
³ یَاہوِہ پر بھروسا رکھ اَور نیکی کرو؛
مُلک میں آباد رہ اَور محفوظ چراگاہ کا لُطف اُٹھا۔
⁴ یَاہوِہ میں مسرُور رہ
اَور وہ تمہاری دِلی مُرادیں پُوری کریں گے۔
⁵ اَپنی راہ یَاہوِہ کے سُپرد کرو؛
اُن پر توکّل رکھ اَور وُہی سَب کچھ پُورا کریں گے:
⁶ وہ تمہاری راستبازی کو سحر کی طرح،
اَور تمہارے حق و اِنصاف کو دوپہر کی دھوپ کی مانند رَوشن کریں گے۔
⁷ یَاہوِہ کے سامنے خاموشی سے کھڑے رہو اَور صبر سے اُن کی آس رکھیں؛
جَب لوگ اَپنی روِشوں میں کامیاب ہُوں،
اَور اَپنے بُرے منصُوبے پایۂ تکمیل تک پہُنچائیں،
تَب آپ پریشان نہ ہوں۔
⁸ قہر سے باز آؤ اَور غضب کو چھوڑ دو؛
بے زار نہ ہو ورنہ آپ سے بدی سرزد ہوگی۔
⁹ بدکردار تو کاٹ ڈالے جایٔیں گے،
لیکن جِن کا توکّل یَاہوِہ پر ہے وہ زمین کے وارِث ہوں گے۔
¹⁰ کچھ ہی دیر باقی ہے، پھر بدکار باقی نہ رہیں گے؛
تُم اُنہیں تلاش کروگے تو بھی اُنہیں نہ پاؤگے۔
¹¹ لیکن حلیم مُلک کے وارِث ہوں گے
اَور خُوب خُوشحالی اَور اِطمینان سے رہیں گے۔
¹² بدکار لوگ راستبازوں کے خِلاف سازش کرتے ہیں
اَور اُن پر دانت پیستے ہیں؛
¹³ لیکن خُداوؔند بدکار لوگوں پر ہنستے ہیں،
کیونکہ وہ جانتے ہیں کہ اُن کی بربادی کا دِن (یعنی عدالت کا دِن) آ رہاہے۔
¹⁴ بدکار لوگ تلوار کھینچتے
اَور کمان کو خم کرتے ہیں
تاکہ غریبوں اَور مُحتاجوں کو گرا دیں،
اَور سیدھی راہ پر چلنے والوں کو قتل کر دیں۔
¹⁵ لیکن اُن کی تلواریں اُن ہی کے دِلوں کو چھیدیں گی،
اَور اُن کی کمانیں توڑ دی جایٔیں گی۔
¹⁶ راستبازوں کی تھوڑی سِی پُونجی
بدکاروں کی بہت سِی دولت سے بہتر ہے؛
¹⁷ کیونکہ بدکاروں کی قُوّت توڑ دی جائے گی،
لیکن یَاہوِہ راستبازوں کو سنبھالتا ہے۔
¹⁸ یَاہوِہ کامل لوگوں کی زندگی کے ایّام کو جانتے ہیں،
اُن کی مِیراث ہمیشہ تک قائِم رہے گی۔
¹⁹ وہ آفت کے وقت مُرجھائیں گے نہیں؛
وہ قحط کے دِنوں میں بھی آسُودہ رہیں گے۔
²⁰ لیکن بدکار نِیست و نابود ہو جایٔیں گے:
یَاہوِہ کے دُشمن کھیتوں کی شادابی کی مانند ہوں گے،
وہ دھوئیں جَیسے دفعتاً غائب ہو جایٔیں گے۔
²¹ بدکار قرض لیتے ہیں لیکن اَدا نہیں کرتے،
لیکن راستباز فیّاضی سے دیتے ہیں؛
²² جنہیں یَاہوِہ برکت دیں گے وہ مُلک کے وارِث ہوں گے،
لیکن جِن پر وہ لعنت کریں گے وہ ہلاک کر دیئے جایٔیں گے۔
²³ اگر یَاہوِہ کسی اِنسان کی روِش سے خُوش ہوتے ہیں،
تو اُسے ثابت قدم رکھتے ہیں؛
²⁴ اگر وہ ٹھوکر بھی کھائے تو گرتا نہیں،
کیونکہ یَاہوِہ اُسے اَپنے ہاتھ سے تھامے رہتے ہیں۔
²⁵ میں جَوان تھا لیکن اَب ضعیف ہو چُکا ہُوں،
تو بھی مَیں نے راستبازوں کو بے یارومددگار
اَور اُن کی اَولاد کو بھیک مانگتے ہُوئے نہیں دیکھا۔
²⁶ دیندار لوگ ہمیشہ فیّاضی سے پیش آتے ہیں اَور فراخدلی سے قرض دیتے ہیں،
اَور اُن کی اَولاد برکت پایٔے گی۔
²⁷ بدی سے باز رہو اَور نیکی کرو؛
تَب تُم مُلک میں ہمیشہ آباد رہوگے۔
²⁸ کیونکہ یَاہوِہ صادقوں کی پسندوں کو عزیز رکھتے ہیں
اَور وہ اَپنے وفادار بندوں کو ترک نہیں کریں گے۔
اُن کی ہمیشہ حِفاظت کی جائے گی،
لیکن بدکار لوگوں کی اَولاد کاٹ ڈالی جائے گی؛
²⁹ راستباز مُلک کے وارِث ہوں گے
اَور اُس میں ہمیشہ بسے رہیں گے۔
³⁰ راستباز کے مُنہ سے دانائی کی باتیں نکلتی ہیں،
اَور اُس کی زبان اِنصاف کی بولی بولتی ہے۔
³¹ اُس کے خُدا کے آئین اُس کے دِل میں ہے؛
اَور اُس کے پاؤں نہیں پھسلتے۔
³² بدکار راستبازوں کی تاک میں رہتے ہیں،
اَور اُن کی جان کے درپے ہوتے ہیں؛
³³ یَاہوِہ اُنہیں بُرے لوگوں کے ہاتھ میں نہیں چھوڑیں گے
اَور جَب وہ عدالت میں پیش ہوں گے تو اُنہیں مُجرم نہیں ٹھہرائیں گے۔
³⁴ یَاہوِہ کی آس رکھو
اَور اُس کی راہ پر چلتے رہو۔
وہ تُمہیں سرفراز کریں گے تاکہ تُم زمین کا وارِث بنو؛
جَب بدکار کاٹ ڈالے جایٔیں گے تو تُم اَپنی آنکھوں سے دیکھوگے۔
³⁵ مَیں نے ایک بدکار اَور سنگدل اِنسان کو اَیسے بڑے اقتدار میں دیکھا
جَیسے کویٔی سرسبز درخت اَپنی اصلی زمین میں پھلتا پھُولتا ہے،
³⁶ لیکن جلد ہی جاتا رہا اَور باقی نہ رہا؛
مَیں نے اُسے تلاش کیا لیکن وہ مِلا ہی نہیں۔
³⁷ مَرد کامل پر نگاہ کرو، راستباز کو دیکھو؛
اَمن پرست شخص کا مُستقبِل رَوشن ہوتاہے۔
³⁸ لیکن سَب گُنہگار ہلاک کر دئیے جایٔیں گے؛
بدکار لوگوں کی نَسل کاٹ ڈالی جائے گی۔
³⁹ راستبازوں کی نَجات یَاہوِہ کی طرف سے ہے؛
مُصیبت کے وقت وہ اُن کا محکم قلعہ ہیں۔
⁴⁰ یَاہوِہ اُن کی مدد کرتے اَور اُنہیں رِہائی بخشتے ہیں؛
وہ اُنہیں بدکاروں سے چُھڑاتے اَور بچا لیتے ہیں،
کیونکہ وہ لوگ اُن میں پناہ لیتے ہیں۔