¹ اَے راستبازو، یَاہوِہ کے حُضُور خُوشی سے گاؤ؛
کیونکہ اُن کی سِتائش کرنا راستبازوں کو زیب دیتاہے۔
² سِتار کے ساتھ یَاہوِہ کی سِتائش کرو؛
دس تار والے بربط کے ساتھ اُس کے لیٔے نغمہ سرائی کرو۔
³ یَاہوِہ کے لیٔے کویٔی نیا نغمہ گاؤ؛
اَچھّی طرح ساز بجاؤ اَور خُوشی سے للکارو۔
⁴ کیونکہ یَاہوِہ کا یہ کلام حق اَور راست ہے؛
اَور اُس کے سَب کام وفاداری کے ہیں۔
⁵ یَاہوِہ راستبازی اَور اِنصاف کو پسند کرتا ہے؛
زمین اُس کی لافانی مَحَبّت سے معموُر ہے۔
⁶ آسمان یَاہوِہ کے کلام سے،
اَور اجرامِ فلکی اُس کے مُنہ کے دَم سے بنے۔
⁷ وہ سمُندر کا پانی گویا مرتبان میں جمع کرتا ہے؛
اَور گہرے سمُندروں کو اَپنے مخزنوں میں رکھتے ہیں۔
⁸ ساری زمین یَاہوِہ سے ڈرے؛
جہان کے سَب باشِندے اُس کا خوف مانیں۔
⁹ کیونکہ اُنہُوں نے فرمایا اَور زمین وُجُود میں آئی؛
اُنہُوں نے حُکم دیا اَور یہ قائِم ہو گئی۔
¹⁰ یَاہوِہ قوموں کے منصُوبوں کو خاک میں مِلا دیتاہے؛
اَور اُمّتوں کے اِرادوں کو پُورا نہیں ہونے دیتا۔
¹¹ لیکن یَاہوِہ کے منصُوبے اَبد تک،
اَور اُس کے دِل کے اِرادے پُشت در پُشت قائِم رہتے ہیں۔
¹² مُبارک ہے وہ قوم، جِس کا خُدا یَاہوِہ ہے،
اَور وہ اُمّت، جسے اُنہُوں نے اَپنی مِیراث کے لیٔے چُن لیا۔
¹³ یَاہوِہ آسمان میں سے نیچے نگاہ کرتا ہے،
اَور سَب بنی آدمؔ کو دیکھتا ہے؛
¹⁴ وہ اَپنی قِیام گاہ سے
زمین کے سَب باشِندوں پر نظر رکھتے ہیں۔
¹⁵ وُہی ہیں جو سَب کے دِلوں کو بناتے ہیں،
اَور اُن کے سَب کاموں کا خیال رکھتے ہیں۔
¹⁶ کویٔی بادشاہ اَپنی فَوج کی کثرت ہی کے باعث سلامت نہیں رہتا؛
اَور کسی سُورما کو اُس کی بڑی قُوّت بچا نہ سکے گی۔
¹⁷ فتح کے لئے گھوڑے پر اُمّید رکھنا فُضول ہے؛
اَپنی بڑی قُوّت کے باوُجُود وہ بچا نہیں سَکتا۔
¹⁸ دیکھو، یَاہوِہ کی آنکھیں اُس سے ڈرنے والوں پر،
اَور اُن پر لگی رہتی ہیں جِن کی اُمّید اُس کی لافانی مَحَبّت پر ہے،
¹⁹ تاکہ وہ اُنہیں موت سے چھُڑائے
اَور قحط کے وقت صحیح و سالِم رکھے۔
²⁰ ہم یَاہوِہ پر آس لگائے بیٹھے ہیں؛
وہ ہماری مدد اَور ہماری سِپر ہے۔
²¹ اُس میں ہمارے دِل شادمان ہیں،
کیونکہ اُس کے پاک نام پر ہمارا توکّل ہے۔
²² اَے یَاہوِہ، آپ کی لافانی مَحَبّت ہم پر ہو،
ہماری آپ ہی پر آس ہے۔