داویؔد کی دعا۔
¹ اَے یَاہوِہ، میرے عادل میری سچّی اِلتجا کو سُنیں؛
میری فریاد پر، توجّہ فرمائیں۔
میری دعا پر کان لگائیں،
جو فریبی لبوں سے نہیں نکلے ہیں۔
² میرے مُقدّمہ کا فیصلہ آپ کی طرف سے ہو؛
آپ کی آنکھیں راستی پر لگی رہتی ہیں۔
³ حالانکہ آپ میرے دِل کو ٹٹولتے اَور رات کے وقت مُجھے آزماتے ہیں،
اَور مُجھے پرکھتے ہیں، لیکن کویٔی خرابی نہیں پاتے؛
مَیں نے ٹھان لیا ہے کہ میرا مُنہ خطا نہ کرے۔
⁴ یہاں تک کہ مُجھے لوگوں نے رشوت دینے کی کوشش کی،
مَیں نے آپ کے لبوں کے کلام کی مدد سے اَپنے آپ کو
ظالموں کی راہوں سے باز رکھا ہے۔
⁵ میرے قدم آپ کی راہوں پر جمے رہے؛
اَور میرے پاؤں پھسلنے نہ پایٔے۔
⁶ اَے خُدا، مَیں آپ سے دعا کرتا ہُوں کیونکہ آپ مُجھے جَواب دیں گے؛
اَپنا کان میری طرف لگائیں اَور میری اِلتجا سُن لیں۔
⁷ آپ جو اَپنے داہنے ہاتھ سے
اَپنے پناہ گزینوں کو اُن کے مُخالفوں سے رِہائی بخشتے ہیں،
اَپنی بڑی شفقت و مَحَبّت کا کرشمہ دِکھائیں۔
⁸ مُجھے اَپنی آنکھ کی پتلی کی طرح محفوظ رکھیں؛
اَور اَپنے پروں کے سایہ میں چُھپائے رکھیں
⁹ اُن بدکار لوگوں سے جو مُجھ پر ظُلم ڈھاتے ہیں،
اَور میرے جانی دُشمنوں سے جو مُجھے گھیرے ہُوئے ہیں۔
¹⁰ اُنہُوں نے اَپنے دِل سخت کر لیٔے ہیں،
اَور اُن کے مُنہ سے تکبُّر کی باتیں نکلتی ہیں۔
¹¹ اُنہُوں نے میرا سُراغ لگا لیا، اَور اَب مُجھے گھیر رکھا ہے،
اَور وہ تاک میں ہیں کہ مُجھے زمین پر پٹک دیں۔
¹² وہ اُس شیر کی مانند ہیں جو اَپنے شِکار کے لیٔے بھُوکا ہو،
کسی بڑے شیرببر کی مانند جو گھات لگائے پوشیدہ جگہ میں بیٹھا رہتاہے۔
¹³ اُٹھیں، اَے یَاہوِہ، اُن کا سامنا کریں اَور اُنہیں گرا دیں؛
اَپنی تلوار سے میری جان کو بدکار لوگوں سے بچائیں۔
¹⁴ اَے یَاہوِہ، اَپنے ہاتھ سے مُجھے اَیسے لوگوں سے بچائیں،
اِس جہاں کے لوگوں سے جِن کا اجر اِسی زندگی میں ہے۔
آپ جنہیں عزیز رکھتے ہیں اُنہیں آسُودہ حال کرتے ہیں؛
اُن کی اَولاد سیر ہوتی ہے،
اَور وہ اَپنے پوتوں کے لیٔے مال و دولت جمع کرکے چھوڑ جاتے ہیں۔
¹⁵ لیکن مَیں تو صداقت میں آپ کا دیدار حاصل کروں گا؛
اَور جَب مَیں جاگوں گا تو آپ کی حُضُوری میں تسلّی پاؤں گا۔