¹ جو خُداتعالیٰ کی پناہ گاہ میں رہتاہے،
وہ قادرمُطلق کے سایہ میں سکونت کرےگا۔
² میں یَاہوِہ کے متعلّق کہُوں گا: ”وہ میری پناہ گاہ اَور میرا قلعہ ہیں،
وہ میرے خُدا ہیں جِن پر میں بھروسا رکھتا ہُوں۔“
³ یقیناً وہ تُمہیں صیّاد کے دام سے
اَور مہلک وَبا سے بچائیں گے۔
⁴ وہ تُمہیں اَپنے پروں سے ڈھانک لیں گے،
اَور تُم اُن کے بازوؤں کے نیچے پناہ پاؤگے؛
اُن کی سچّائی تمہاری سِپر اَور قلعہ ہوگی۔
⁵ تُم نہ رات کی ہیبت سے ڈروگے،
اَور نہ دِن کو چلنے والے تیر سے،
⁶ نہ اُس وَبا سے جو تاریکی میں پھیلتی ہے،
اَور نہ اُس ہلاکت سے جو دوپہر کو ویران کرتی ہے۔
⁷ تمہارے آس پاس ایک ہزار گِر جایٔیں گے،
اَور تمہارے داہنے ہاتھ کی طرف دس ہزار،
لیکن وہ تمہارے نزدیک نہ آئے گی۔
⁸ تُم محض اَپنی آنکھوں سے اُنہیں دیکھوگے
اَور بدکار لوگوں کا اَنجام تمہارے سامنے ہوگا۔
⁹ اگر تُم، ”خُداتعالیٰ کو اَپنا مَسکن بنالو،
یعنی یَاہوِہ کو، جو میری بھی پناہ گاہ ہیں۔“
¹⁰ تُمہیں نہ تو کویٔی اِیذا پہُنچے گی،
اَور نہ ہی کویٔی آفت تمہارے خیمہ کے نزدیک آئے گی۔
¹¹ کیونکہ وہ اَپنے فرشتوں کو تمہارے متعلّق حُکم دیں گے
کہ وہ آپ کی سَب راہوں میں آپ کی خُوب حِفاظت کریں؛
¹² وہ فرشتے آپ کو اَپنے ہاتھوں پر اُٹھا لیں گے،
تاکہ آپ کے پاؤں کو کسی پتّھر سے ٹھیس نہ لگنے پایٔے۔
¹³ تُم شیرببر اَور ناگ کو روندوگے؛
اَور جَوان شیر اَور اَژدہے کو پامال کروگے۔
¹⁴ یَاہوِہ فرماتے ہیں، ”اُسے مُجھ سے مَحَبّت ہے،“
اِس لیٔے، ”مَیں اُسے چُھڑاؤں گا؛
میں اُس کی حِفاظت کروں گا کیونکہ اُس نے میرا نام پہچانا ہے۔
¹⁵ وہ مُجھے پُکارے گا، اَور مَیں اُسے جَواب دُوں گا؛
میں مُصیبت میں اُس کے ساتھ رہُوں گا،
میں اُسے چُھڑاؤں گا اَور عزّت بخشوں گا۔
¹⁶ میں اُسے عمر کی درازی سے آسُودہ کروں گا
اَور اَپنی نَجات اُسے دِکھاؤں گا۔“

(Biblica® آزادانہ اردو ہم عصر ترجمہ™)