زبُور 90‏–106
زبُور 90
مَرد خُدا مَوشہ کی دعا۔
¹ خُداوؔند! پُشت در پُشت
آپ ہی ہماری قِیام گاہ رہے ہیں۔
² اِس سے پہلے کہ پہاڑ پیدا ہُوئے
یا آپ زمین اَور دُنیا کو وُجُود میں لائے،
اَزل سے اَبد تک آپ ہی خُدا ہیں۔
³ آپ اِنسانوں کو یہ کہتے ہُوئے، ”پھر خاک میں لَوٹاتے ہیں کہ
اَے بنی آدمؔ! خاک میں لَوٹ جاؤ۔“
⁴ کیونکہ آپ کی نظر میں ہزار بَرس
گزرے ہُوئے کل کی مانند ہیں،
یا رات کے ایک پہر کی طرح۔
⁵ آپ آدمیوں کو موت کے سیلاب میں بہا لے جاتے ہیں؛
وہ صُبح کو اُگنے والی گھاس کی مانند ہوتے ہیں۔
⁶ اَیسی سرسبز گھاس جو صُبح کو لہلہاتی ہے،
لیکن شام کو مُرجھاتی اَور سُوکھ جاتی ہے۔
⁷ ہم آپ کے قہر سے فنا ہو گئے
اَور آپ کی خفگی سے گھبرا گیٔے ہیں۔
⁸ آپ نے ہماری بد کرداریوں کو اَپنے سامنے،
اَور ہمارے پوشیدہ گُناہوں کو اَپنی حُضُوری کی رَوشنی میں رکھا ہُواہے۔
⁹ ہمارے زندگی کے تمام دِن آپ کے غضب میں بیت جاتے ہیں؛
اَور ہم اَپنے سال آہ کی طرح گزارتے ہیں۔
¹⁰ ہماری عمر کی میعاد محض ستّر بَرس ہے،
اَور اگر ہم میں قُوّت ہو تو اسّی بَرس؛
لیکن یہ عرصہ محض مشقّت اَور رنج و غم میں گزر جاتا ہے،
کیونکہ یہ دِن جلد چلے جاتے ہیں اَور ہم رخصت ہو جاتے ہیں۔
¹¹ آپ کے قہر کی شِدّت کو کون جانتا ہے؟
کیونکہ آپ کے غضب اَور آپ کے خوف کی شِدّت یکساں ہے۔
¹² ہمیں صحیح طور سے اَپنی زندگی کے دِن گننا سکھائیں،
تاکہ ہمارے دِل کو دانائی حاصل ہو۔
¹³ اَے یَاہوِہ! ترس کھایٔیں، آخِر یہ کب تک ہوتا رہے گا؟
اَپنے خادِموں پر رحم فرمائیں۔
¹⁴ صُبح کو ہمیں اَپنی لافانی مَحَبّت سے آسُودہ کریں،
تاکہ ہم خُوشی سے گائیں اَور عمر بھر شادمان رہیں۔
¹⁵ جتنے دِن آپ نے ہمیں دُکھ دیا اَور جتنے سال ہم مُصیبت میں رہے،
اُتنے ہی عرصہ تک ہمیں خُوشی عنایت فرمائیں۔
¹⁶ آپ کے کارنامے آپ کے خادِموں پر،
اَور آپ کی شوکت اُن کی اَولاد پر ظاہر ہو۔
¹⁷ ہمارے خُداوؔند خُدا کا لُطف و کرم ہم پر بنا رہے؛
ہمارے ہاتھوں کے کام ہمارے لیٔے کامیابی لائیں۔
آپ ہمارے ہاتھوں کے کام کو ترقّی بخشیں۔

(Biblica® آزادانہ اردو ہم عصر ترجمہ™)