داویؔد کی دعا۔
¹ اَے یَاہوِہ، میری دعا سُنیں اَور مُجھے جَواب دیں،
کیونکہ مَیں مسکین اَور مُحتاج ہُوں۔
² میری جان کی حِفاظت کریں کیونکہ مَیں آپ کا جاں نثار ہُوں؛
اَپنے خادِم کو بچا لیں جِس کا آپ پر توکّل ہے۔
آپ میرے خُدا ہیں؛ ³ اَے خُداوؔند، مُجھ پر رحم کریں،
کیونکہ مَیں دِن بھر آپ سے فریاد کرتا ہُوں۔
⁴ اَپنے خادِم کے دِل کو شاد کر دیں،
کیونکہ اَے خُداوؔند، میں اَپنی جان آپ کی طرف اُٹھاتا ہُوں۔
⁵ اَے خُداوؔند، آپ غفور اَور بھلےہیں،
اَور جتنے آپ کو پُکارتے ہیں، اُن سَب پر آپ کی بڑی شفقت و مَحَبّت ہے۔
⁶ اَے یَاہوِہ، میری دعا سُنیں؛
اَور رحم کے لیٔے میری فریاد پر کان لگائیں۔
⁷ میں اَپنی مُصیبت کے دِن آپ کو پُکاروں گا،
کیونکہ آپ مُجھے جَواب دیں گے۔
⁸ اَے خُداوؔند، معبُودوں میں آپ سا کویٔی نہیں؛
اَور آپ کی صنعت گری بے نظیر ہے۔
⁹ اَے خُداوؔند، جِتنی قومیں آپ نے بنائی ہیں
سَب آکر آپ کو سَجدہ کریں گی؛
اَور آپ کے نام کی تمجید کریں گی۔
¹⁰ کیونکہ آپ عظیم ہیں اَور عجِیب و غریب کام کرتے ہیں؛
صِرف آپ ہی خُدا ہیں۔
¹¹ اَے یَاہوِہ، مُجھے اَپنی راہ کی تعلیم دیں،
اَور مَیں آپ کی راہِ راست پر چلُوں گا؛
میرے دِل کو یکسوئی عنایت فرمائیں۔
تاکہ مَیں آپ کے نام کا خوف مانوں۔
¹² اَے میرے خُداوؔند، خُدا، میں پُورے دِل سے آپ کی حَمد کروں گا؛
میں اَبد تک آپ کے نام کی تمجید کروں گا۔
¹³ کیونکہ مُجھ پر آپ کی بڑی شفقت و مَحَبّت ہے؛
اَور آپ نے مُجھے پاتال کی گہرائیوں سے چُھڑا لیا ہے۔
¹⁴ اَے خُدا، مغروُر مُجھ پر حملہ کر رہے ہیں؛
اَور سنگدل لوگوں کی جماعت میری جان کے درپے ہے۔
اَیسے لوگ آپ کو پیشِ نظر نہیں رکھتے۔
¹⁵ لیکن اَے خُداوؔند، آپ رحیم و کریم خُدا ہیں،
جو قہر کرنے میں دھیمے اَور شفقت اَور وفاداری میں غنی ہیں۔
¹⁶ میری طرف متوجّہ ہوں اَور مُجھ پر رحم کریں؛
اَپنے خادِم کو اَپنی قُوّت بخشیں
اَور اَپنی خادِمہ کے بیٹے کو بچا لیں۔
¹⁷ مُجھے اَپنی بھلائی کا کویٔی نِشان دِکھائیں،
تاکہ میرے دُشمن اُسے دیکھیں اَور شرمندہ ہوں،
کیونکہ آپ نے اَے یَاہوِہ، میری مدد کی اَور مُجھے تسلّی بخشی ہے۔

(Biblica® آزادانہ اردو ہم عصر ترجمہ™)