موسیقی ہدایت کار کے لیٔے۔ ”عہد کے شُوشنؔ“ کے سُرپر مَبنی آسفؔ کا زبُور۔
¹ اَے اِسرائیل کے چوپان، ہماری سُنیں،
خُدا جو گلّہ کی مانند یُوسیفؔ کی رہنمائی کرتے ہیں۔
خُدا جو کروبیم کے درمیان تخت نشین ہیں،
جلوہ گِر ہوں!
² اِفرائیمؔ، بِنیامین اَور منشّہ کے سامنے
اَپنی قُدرت کو بیدار کریں؛
اَور آکر ہمیں بچائیں۔
³ اَے خُدا، ہمیں بحال کریں؛
اَپنے چہرہ کا نُور ہم پر جلوہ گِر فرمائیں،
تاکہ ہم نَجات پائیں۔
⁴ اَے یَاہوِہ، قادرمُطلق خُدا،
اَپنے لوگوں کی دعاؤں کے خِلاف
خُدا کا قہر کب تک بھڑکتا رہے گا؟
⁵ خُدا نے اُنہیں آنسُوؤں کی روٹی کھِلائی؛
اَور اُنہیں پیالے بھر بھرکے آنسُو پلائے۔
⁶ خُدا نے ہمیں اَپنے پڑوسیوں کے لیٔے تنازعہ کا باعث بنا دیا ہے،
اَور ہمارے دُشمن ہمارا مضحکہ اُڑاتے ہیں۔
⁷ اَے قادرمُطلق خُدا! ہمیں بحال کریں؛
اَپنے چہرہ کا نُور ہم پر جلوہ گِر فرمائیں،
تاکہ ہم بچ جایٔیں۔
⁸ خُدا مُلک مِصر سے ایک انگور کی بیل لے آئے؛
اَور قوموں کو اُکھاڑ کر اُسے لگایا۔
⁹ خُدا نے اُس کے لیٔے زمین تیّار کی،
اَور اُس نے جڑ پکڑ لی اَور سارے مُلک میں پھیل گئی۔
¹⁰ پہاڑ اُس کے سایہ سے،
اَور مضبُوط دیودار خُدا کی شاخوں سے ڈھک گیٔے۔
¹¹ اُس نے اَپنی شاخیں سمُندر (بحرِ رُوم) تک،
اَور اُس کی ٹہنیاں دریا (دریائے فراتؔ) تک پھیلا دیں۔
¹² خُدا نے اُس کی باڑیں کیوں گرا دیں،
کہ سَب آنے جانے والے انگور توڑتے ہیں؟
¹³ جنگلی سُؤر اُسے برباد کرتے ہیں
اَور جنگل کے جانور اُسے کھا جاتے ہیں۔
¹⁴ اَے قادرمُطلق خُدا! ہمارے پاس لَوٹ آئیں،
آسمان پر سے نیچے نگاہ کریں اَور دیکھیں!
اِس انگور کی بیل کی نگہبانی کریں،
¹⁵ جو جڑ خُدا کے داہنے ہاتھ نے لگائی ہے،
اَورجو شاخ خُدا نے اَپنے لیٔے بُلند کی ہے۔
¹⁶ خُدا کی تاک کاٹ ڈالی گئی اَور آگ میں جَلا دی گئی؛
اَور خُدا کی ڈانٹ سے ہی لوگ تباہ ہو جاتے ہیں۔
¹⁷ خُدا کا ہاتھ خُدا کی داہنی طرف کے اِنسان پر رہے،
یعنی اِبن آدمؔ پر جسے خُدا نے اَپنے لیٔے برپا کیا ہے۔
¹⁸ تَب ہم خُدا سے برگشتہ نہ ہوں گے؛
ہمیں بحال کریں اَور ہم خُدا کا نام لیا کریں گے۔
¹⁹ اَے یَاہوِہ، قادرمُطلق خُدا! ہمیں بحال کریں؛
اَپنے چہرہ کا نُور ہم پر جلوہ گِر فرمائیں،
تاکہ ہم بچ جایٔیں۔

(Biblica® آزادانہ اردو ہم عصر ترجمہ™)