موسیقی ہدایت کار کے لیٔے۔ ایک نغمہ۔ ایک زبُور۔
¹ اَے ساری زمین کے لوگو، خُوشی کے ساتھ خُدا کے لیٔے نعرہ مارو!
² اُن کے نام کے جلال کا نغمہ گاؤ؛
اُن کی سِتائش کرتے ہُوئے تمجید کرو!
³ خُدا سے کہو، ”آپ کے کارنامے کیا ہی مُہیب ہیں!
آپ کی قُدرت اِس قدر عظیم ہے
کہ آپ کے دُشمن آپ کے سامنے عاجزی کرنے لگتے ہیں۔
⁴ ساری زمین آپ کو سَجدہ کرتی ہے؛
ساری قومیں آپ کے سامنے نغمہ گاتی ہیں
اَور آپ کے نام کی سِتائش کرتی ہیں۔“
⁵ آؤ اَور دیکھو کہ خُدا نے کیا کچھ کیا ہے،
بنی آدمؔ کی خاطِر اُن کے کارنامے کس قدر مُہیب ہیں!
⁶ اُنہُوں نے سمُندر کو خشک زمین میں بدل دیا،
اَور وہ دریا میں سے پیدل گزر گئے۔
آؤ ہم اُن میں خُوشی منائیں۔
⁷ وہ اَپنی قُدرت سے اَبد تک سلطنت کرتے ہیں،
اُن کی آنکھیں قوموں پر نگاہ رکھے ہُوئے ہیں۔
لہٰذا بغاوت پر آمادہ لوگ اُن کے خِلاف سرکشی نہ کریں۔
⁸ اَے سَب قوموں! ہمارے خُدا کی سِتائش کرو،
اُن کی تعریف میں تمہاری صدا گونج اُٹھے؛
⁹ اُنہُوں نے ہماری جانیں بچائی ہیں
اَور ہمارے پاؤں کو پھسلنے نہیں دیا۔
¹⁰ کیونکہ اَے خُدا، آپ نے ہمیں آزما لیا ہے؛
اَور ہمیں آگ میں تائی ہُوئی چاندی کی مانند پاک کر دیا ہے۔
¹¹ آپ ہمیں قَیدخانہ میں لے آئے
اَور ہماری پیٹھ پر بوجھ لاد دئیے۔
¹² آپ نے لوگوں کو ہمارے سَر پر سوار کیا اَور ہم آگ اَور پانی میں سے گزرے،
لیکن آپ ہمیں اَیسے مقام پر لے آئے جہاں فراوانی ہی فراوانی ہے۔
¹³ میں سوختنی نذریں لے کر آپ کے ہیکل میں آؤں گا
اَور اَپنی وہ مَنّتیں آپ کے لئے پُوری کروں گا۔
¹⁴ جِن کا میری مُصیبت کے ایّام میں
میرے لبوں نے وعدہ کیا اَورجو میرے مُنہ سے نکلیں،
¹⁵ مَیں آپ کے لیٔے موٹے تازہ جانوروں کی سوختنی نذر
اَور مینڈھوں کے چڑھاوے؛
اَور بَیل اَور بکرے پیش کروں گا۔
¹⁶ اَے خُدا سے ڈرنے والے لوگو! سَب آؤ اَور سُنو؛
تاکہ میں بتاؤں کہ اُنہُوں نے میرے لیٔے کیا کچھ کیا ہے۔
¹⁷ مَیں نے اَپنے مُنہ سے اُنہیں پُکارا؛
اُن کی تمجید میری زبان پر تھی۔
¹⁸ اگر مَیں بدی کو اَپنے دِل میں رکھتا،
تو خُداوؔند میری دعا نہ سُنتے؛
¹⁹ لیکن خُدا نے یقیناً سُن لیا ہے؛
اَور میری دعا کی آواز پر توجّہ فرمائی ہے۔
²⁰ مُبارک ہیں خُدا،
جنہوں نے نہ تو میری دعا کو ردّ کیا
اَور نہ اَپنی شفقت و مَحَبّت سے مُجھے محروم رکھا!

(Biblica® آزادانہ اردو ہم عصر ترجمہ™)