موسیقی ہدایت کار کے لیٔے۔ داویؔد کا زبُور۔
¹ اَے خُدا، جَب مَیں دعا میں فریاد کروں تو آپ اُسے سُن لیں؛
اَور میری جان کو دُشمن کی دھمکیوں سے بچائے رکھیں۔
² بدکار لوگوں کی سازش،
اَور بدکرداروں کے ہنگامہ سے مُجھے محفوظ رکھیں۔
³ وہ اَپنی زبانوں کو تلوار کی مانند تیز کرتے ہیں
اَور اَپنی باتوں کے مہلک تیر چلاتے ہیں۔
⁴ وہ بے قُصُور اِنسان کو چھُپ کر نِشانہ بناتے ہیں؛
اَور کسی خوف کے بغیر اَچانک وار کرتے ہیں۔
⁵ وہ بُرے منصُوبے باندھنے میں ایک دُوسرے کو مشتعل کرتے ہیں،
اَور اَپنے جال پھیلانے کی باتیں کرتے ہیں؛
اَور خُود سے پُوچھتے ہیں، ”اُنہیں کون دیکھے گا؟“
⁶ وہ لوگ بُرائی کے منصُوبے بناتے ہیں اَور ایک دُوسرے سے کہتے ہیں،
”ہم نے کیا ہی خُوب منصُوبہ بنایا!“
یقیناً اِنسان کے دِل اَور دماغ بڑے چالاک ہوتے ہیں۔
⁷ لیکن خُدا اُن پر تیر برسائیں گے؛
اَور وہ ناگہاں زخمی ہو جایٔیں گے۔
⁸ وہ اُن کی اَپنی زبانوں کو اُن کے خِلاف گویا کرکے
اُنہیں برباد کر دیں گے؛
اَور سَب لوگ اُنہیں دیکھ دیکھ کر حقارت سے اَپنے سَر ہلائیں گے۔
⁹ تمام بنی آدمؔ ڈر جایٔیں گے؛
اَور خُدا کے کاموں کا ذِکر کریں گے
اَورجو کچھ خُدا نے کیا ہے اُس پر غوروخوض کریں گے۔
¹⁰ راستباز یَاہوِہ میں شادمان ہوں
اَور اُس میں پناہ لیں؛
سَب جو راست دِل ہیں اُن کی سِتائش کریں!

(Biblica® آزادانہ اردو ہم عصر ترجمہ™)