آسفؔ کا زبُور۔
¹ قادر یَاہوِہ‏ خُدا کلام کرتے ہیں،
اَور طُلوع آفتاب سے غروب تک،
دُنیا کو بُلاتے ہیں،
² صِیّونؔ سے جو حُسن میں کامل ہے،
خُدا جلوہ گِر ہوتے ہیں۔
³ ہمارے خُدا آتے ہیں
اَور وہ خاموش نہ رہیں گے؛
آگ اُن کے آگے بھسم کرتی جائے گی،
اَور اُن کے چاروں طرف تیز آندھی چلے گی۔
⁴ خُدا اَپنی اُمّت کا اِنصاف کرنے کے لیٔے،
اُوپر سے آسمان کو اَور زمین کو بُلاتے ہیں۔
⁵ اُنہُوں نے فرمایا، ”میرے مُقدّسین کو میرے سامنے جمع کرو،
جنہوں نے قُربانی کے ذریعہ میرے ساتھ عہد باندھا ہے۔“
⁶ اَور آسمان اُن کی راستبازی کا اعلان کریں گے،
کیونکہ خُود خُدا ہی مُنصِف ہیں۔
⁷ ”اَے میری اُمّت سُنو، میں کلام کروں گا؛
اَے اِسرائیل! مَیں تمہارے خِلاف گواہی دُوں گا:
میں خُدا ہُوں، تمہارا خُدا میں ہی ہُوں۔
⁸ میں تُمہیں تمہاری قُربانیوں کے سبب سے تنبیہ نہیں کر رہا
نہ ہی تمہاری سوختنی نذروں کے باعث جو ہمیشہ میرے سامنے رہتی ہیں۔
⁹ مُجھے آپ کے مویشی خانہ میں سے کسی بَیل کی قُربانی کی حاجت نہیں،
اَور نہ آپ کے باڑوں میں سے بکروں کی،
¹⁰ کیونکہ جنگل کا ہر جاندار،
اَور ہزاروں پہاڑوں پر کے مویشی میرے ہی ہیں۔
¹¹ میں پہاڑوں پر کے ہر پرندہ کو جانتا ہُوں،
اَور میدان کے حَیوانات میرے ہی ہیں۔
¹² اگر مَیں بھُوکا ہوتا تو آپ سے نہ کہتا،
کیونکہ دُنیا اَورجو کچھ اُس میں ہے وہ میرا ہے۔
¹³ کیا میں بَیلوں کا گوشت کھاؤں
اَور بکروں کا خُون پِیؤں؟
¹⁴ ”خُدا کے لیٔے شُکر گُزاری کی قُربانیاں گزرانو،
اَور خُداتعالیٰ کے لیٔے اَپنی مَنّتیں پُوری کرو،
¹⁵ اَور مُصیبت کے دِن مُجھے پُکارو؛
میں تُمہیں چُھڑاؤں گا اَور تُم میری تمجید کروگے۔“
¹⁶ لیکن بدکار سے خُدا کہتے ہیں:
”تُمہیں میرے اَحکام بَیان کرنے کا کیا حق ہے
اَور تُم میرے عہد کو اَپنے لبوں پر کیوں لاتے ہو؟
¹⁷ تُم میری ہدایت سے نفرت کرتے ہو
اَور میرے کلام کو پیٹھ پیچھے پھینک دیتے ہو۔
¹⁸ جَب تُم کسی چور کو دیکھ لیتے ہو، تُم اُس سے مِل جاتے ہو؛
اَور زانیوں کا شریک بَن جاتے ہو۔
¹⁹ تُم اَپنا مُنہ بدی کے لیٔے
اَور اَپنی زبان فریب گھڑنے کے لیٔے اِستعمال کرتے ہو۔
²⁰ تُم اَپنے بھایٔی کے خِلاف بولتے ہی رہتے ہو
اَور اَپنی ہی ماں کے بیٹے پر تہمت لگاتے ہو۔
²¹ تُم نے یہ کام کئے اَور مَیں خاموش رہا؛
تُم نے سوچا کہ میں بھی گویا تُم ہی سا ہُوں۔
لیکن مَیں تُمہیں تنبیہ کروں گا۔
اَور تمہارے مُنہ پر تُمہیں اِلزام دُوں گا۔
²² ”اَب اَے خُدا کو فراموش کرنے والو! اُن پر توجّہ کرو،
اَیسا نہ ہو کہ میں تُمہیں پھاڑ ڈالوں اَور کویٔی چھُڑانے والا نہ ہو:
²³ جو شُکر گُزاری کی قُربانی پیش کرتا ہے وہ میری تمجید کرتا ہے،
اَور وہ اَپنی روِش دُرست رکھتا ہے، تاکہ میں اُسے خُدا کی نَجات دِکھاؤں۔“

(Biblica® آزادانہ اردو ہم عصر ترجمہ™)