ایک نغمہ، بنی قورحؔ کی تصنیف زبُور۔
¹ ہمارے خُدا کے شہر میں یعنی اُس کے مُقدّس پہاڑ پر،
یَاہوِہ عظیم اَور بےحد قابل سِتائش ہے۔
² ضِفونؔ کی چوٹیوں کی طرح، کوہِ صِیّونؔ،
جو عظیم بادشاہ کا شہر ہے،
اَپنی شان و شوکت کے لحاظ سے اعلیٰ ہے،
اَور سارے جہان کے لیٔے باعثِ مسرّت ہے۔
³ خُدا اُس کے قلعوں میں پناہ لئے ہُوئے ہیں؛
اُنہُوں نے اَپنے آپ کو اُن کی پناہ گاہ ٹھہرایا ہے۔
⁴ جَب بادشاہوں نے اَپنی فَوجیں جمع کیں،
اَور مِل کر آگے بڑھے،
⁵ تو اُس شہر کو دیکھ کر دنگ رہ گیٔے؛
اَور ڈر کے مارے بھاگ نکلے۔
⁶ وہاں اُن پر کپکپی طاری ہو گئی،
اَور وہ ایک زچّہ کی مانند سخت درد کی سِی تکلیف میں مُبتلا ہو گئے۔
⁷ آپ نے اُنہیں ترشیشؔ شہر کے جہازوں کی مانند تباہ کر ڈالا،
اَیسی تباہی جو بادِ مشرق لاتی ہے۔
⁸ جَیسا ہم نے سُنا تھا،
یعنی اَپنے لشکروں کے یَاہوِہ کے شہر میں،
جَیسا ہم نے سُنا تھا،
وَیسا ہی ہم نے دیکھا
قادرمُطلق یَاہوِہ کے شہر میں، خُدا اُسے ہمیشہ محفوظ رکھےگا۔
⁹ اَے خُدا، ہم نے آپ کے ہیکل کے اَندر،
آپ کی لافانی مَحَبّت پر غور کیا۔
¹⁰ اَے خُدا، جَیسا آپ کا نام ہے،
وَیسی ہی آپ کی سِتائش زمین کی اِنتہا تک پہُنچتی ہے؛
آپ کا داہنا ہاتھ راستی سے معموُر ہے۔
¹¹ آپ کے فیصلوں کے باعث
کوہِ صِیّونؔ مسرُور ہے،
اَور یہُوداہؔ کے دیہات خُوش ہیں۔
¹² صِیّونؔ کے گِرد پھرو، اُس کا طواف کرو،
اُس کے بُرجوں کا شُمار کرو،
¹³ اُس کی شہرپناہ کو غور سے دیکھو،
اُس کے قلعوں پر نظر ڈالو،
تاکہ تُم آنے والی پُشتوں کو
اُن کے متعلّق بتا سکو۔
¹⁴ کیونکہ یہ خُدا ابدُالآباد تک ہمارا خُدا ہے؛
وہ موت تک ہمارا ہادی بنا رہے گا۔