داویؔد کا زبُور۔ جَب داویؔد نے اَبی ملیخ کے سامنے پاگل پن کا بہانہ بنایا۔ اَبی ملکِ نے اُسے نکال دیا اَور وہ چلا گیا۔
¹ میں ہر وقت یَاہوِہ کی تعریف کروں گا؛
اُن کی سِتائش ہمیشہ میرے لبوں پر ہوگی۔
² میری جان یَاہوِہ پر فخر کرےگی؛
حلیم اُسے سُنیں گے اَور خُوش ہوں گے۔
³ میرے ساتھ یَاہوِہ کی تمجید کرو؛
آؤ ہم مِل کر اُن کے نام کی تعظیم کریں۔
⁴ میں یَاہوِہ کا طالب ہُوا اَور اُنہُوں نے مُجھے جَواب دیا؛
اَور اُنہُوں نے مُجھے سارے خوف سے آزاد کر دیا۔
⁵ جو اُن کی طرف نظر اُٹھاتے ہیں مُنوّر ہو جاتے ہیں؛
اُن کے چہروں پر کبھی شرمندگی نہ آئے گی۔
⁶ اِس غریب نے پُکارا اَور یَاہوِہ نے اُس کی سُنی؛
اَور اُنہُوں نے اُسے اُس کی ساری پریشانیوں سے بچا لیا۔
⁷ یَاہوِہ سے ڈرنے والوں کے چاروں طرف اُن کا فرشتہ خیمہ زن ہوتاہے؛
اَور اُنہیں بچاتا ہے۔
⁸ آزما کر دیکھو کہ یَاہوِہ کیسے مہربان ہیں؛
مُبارک ہے وہ آدمی جو اُن میں پناہ لیتا ہے۔
⁹ یَاہوِہ سے ڈرو، اَے اُن کے مُقدّسین،
کیونکہ جو اُن سے ڈرتے ہیں اُنہیں کچھ کمی نہیں ہوتی۔
¹⁰ شیرببر کمزور اَور بھُوکے ہو سکتے ہیں،
لیکن یَاہوِہ کے طالب کسی اَچھّی چیز کے مُحتاج نہ ہوں گے۔
¹¹ اَے میرے بچّو! آؤ، میری سُنو؛
میں تُمہیں یَاہوِہ کا خوف ماَننا سِکھاؤں گا۔
¹² تُم میں سے جو کویٔی زندگی سے مَحَبّت رکھتا ہے
اَورجو بھلائی اَور عمر درازی کا خواہشمند ہے،
¹³ وہ اَپنی زبان کو بدی سے
اَور اَپنے لبوں کو جھُوٹ بولنے سے دُور رکھے۔
¹⁴ بدی سے دُور رہے اَور نیکی کرے؛
صُلح کا طالب ہو اَور اُس کی کوشش میں رہے۔
¹⁵ یَاہوِہ کی آنکھیں راستبازوں پر لگی رہتی ہیں
اَور اُن کے کان اُن کی دعاؤں پر لگے رہتے ہیں؛
¹⁶ مگر یَاہوِہ بدکاروں کے خِلاف رہتے ہیں،
تاکہ اُن کا نام زمین پر سے مٹا ڈالیں۔
¹⁷ راستباز فریاد کرتے ہیں اَور یَاہوِہ اُن کی سُنتے ہیں؛
اَور اُنہیں اُن کی تمام پریشانیوں سے چُھڑاتے ہیں۔
¹⁸ یَاہوِہ شکستہ دِل اِنسانوں کے قریب ہیں
اَور وہ خستہ جانوں کو بچاتے ہیں۔
¹⁹ خواہ راستباز پر کتنی ہی مُصیبتیں آ پڑی ہُوں،
تو بھی یَاہوِہ اُسے اُن سَب سے رِہائی بخشتے ہیں؛
²⁰ وہ اُس کی ساری ہڈّیوں کو محفوظ رکھتے ہیں،
اُن میں سے ایک بھی توڑی نہ جائے گی۔
²¹ بدی بدکار لوگوں کو ہلاک کرےگی؛
اَور راستباز کے حریف مُجرم قرار دیئے جایٔیں گے۔
²² یَاہوِہ اَپنے خادِموں کی جانوں کا فدیہ دیتے ہیں؛
اَورجو کویٔی اُن میں پناہ لے وہ مُجرم نہ ٹھہرے گا۔