موسیقی ہدایت کار کے لیٔے۔ داویؔد کا زبُور۔
¹ آسمان خُدا کا جلال ظاہر کرتا ہے؛
اَور فِضا اُس کی دستکاری دِکھاتی ہے۔
² ہر دِن اگلے دِن کے لیٔے خُدا کی شان کے بارے میں بات کرتا ہے؛
اَور رات اگلی رات کو حِکمت کو ظاہر کرتی ہے۔
³ آسمان و فضا کی کویٔی اَیسی زبان، یا کلام نہیں؛
جِس میں اُس کی آواز نہ سُنایٔی دیتی ہو۔
⁴ پھر بھی اُن کی آواز ساری رُوئے زمین پر،
اَور اُن کا کلام دُنیا کی اِنتہا تک پہُنچتا ہے۔
خُدا نے آسمان میں آفتاب کے لیٔے ایک خیمہ کھڑا کیا ہے۔
⁵ آفتاب جو دُلہا کی مانند، اَپنی خلوت گاہ سے نکلتا ہے،
جَیسے کویٔی پہلوان، اَپنی دَوڑ دَوڑنے کے لیٔے خُوش ہوتاہے۔
⁶ وہ آسمان کے ایک سِرے سے نکلتا ہے،
اَور دُوسرے سِرے تک گشت کرتا ہے؛
اَور اُس کی حرارت سے کویٔی چیز پوشیدہ نہیں رہتی۔
⁷ یَاہوِہ کے آئین کامل ہے،
جو جان کو تقویّت بخشتی ہے،
یَاہوِہ کے شہادتیں قابلِ اِعتماد ہیں،
جو سادہ دِل کو دانشمند بنا دیتے ہیں۔
⁸ یَاہوِہ کے فرمان راست ہیں،
جو دِل کو راحت بخشتے ہیں۔
یَاہوِہ کے اَحکام درخشاں ہیں،
جو آنکھوں کو مُنوّر کرتے ہیں۔
⁹ یَاہوِہ کا خوف پاک ہے،
جو اَبد تک قائِم رہتاہے۔
یَاہوِہ کے قوانین یقینی،
اَور بالکُل راست ہیں۔
¹⁰ وہ قوانین سونے سے بیش قیمت ہیں،
بَلکہ کندن سے بھی زِیادہ،
وہ شہد سے بھی زِیادہ شیریں ہیں،
بَلکہ چھتّے سے ٹپکتے ہُوئے شہد سے بھی زِیادہ شیریں۔
¹¹ اُن ہی سے آپ کا خادِم تنبیہ پاتاہے؛
اُن پر عَمل کرنے میں بڑا اجر ہے۔
¹² اَپنی خطاؤں کو کون سمجھ سَکتا ہے؟
میرے نادانستہ عیب مُعاف فرمائیں۔
¹³ اَپنے خادِم کو دانستہ گُناہوں سے بھی باز رکھیں؛
وہ مُجھ پر غالب نہ آئیں۔
تَب میں بے اِلزام ٹھہروں گا،
اَور گُناہِ کبیرہ سے بچا رہُوں گا۔
¹⁴ اَے میرے یَاہوِہ، میری چٹّان اَور میرے نَجات دِہندہ،
میرے مُنہ کا کلام اَور میرے دِل کی خُوشی
آپ کے حُضُور مقبُول ٹھہرے۔