¹ اَے یَاہوِہ، اَے اِنتقام لینے والے خُدا،
اَے خدائے مُنتقِم! جلوہ گِر ہوں۔
² اَے جہاں کا اِنصاف کرنے والے اُٹھیں؛
اَور مغروُروں کو بدلہ دیں جِس کے وہ مُستحق ہیں۔
³ اَے یَاہوِہ، بدکار لوگ کب تک،
کب تک فخر کرتے رہیں گے؟
⁴ وہ گھمنڈ بھری باتیں کرتے ہیں؛
سَب بد کِردار تکبُّر سے بھرے ہُوئے ہیں۔
⁵ اَے یَاہوِہ، وہ آپ کے لوگوں کو کُچل دیتے ہیں؛
اَور آپ کی مِیراث پر ظُلم ڈھاتے ہیں۔
⁶ وہ بِیوہ اَور پردیسی کو قتل کرتے ہیں؛
اَور یتیم کو مار ڈالتے ہیں۔
⁷ وہ کہتے ہیں: ”یَاہوِہ نہیں دیکھتے؛
یعقوب کے خُدا خیال نہیں کرتے۔“
⁸ اَے قوم کے نادانوں! غور کرو؛
اَے احمقو! تُمہیں کب عقل آئے گی؟
⁹ جِس نے کان بنائے، کیا وہ خُود نہیں سُنتے؟
اَور جِس نے آنکھ بنائی، کیا وہ آپ نہیں دیکھتے؟
¹⁰ کیا وہ جو قوموں کو تنبیہ کرتے ہیں، سزا نہ دیں گے؟
اَورجو اِنسانوں کو تعلیم دیتے ہیں، کیا اُن کے پاس علم کی کمی ہے؟
¹¹ یَاہوِہ اِنسانوں کے خیالات جانتے ہیں؛
اُنہیں مَعلُوم ہے کہ وہ باطِل ہیں۔
¹² اَے یَاہوِہ، مُبارک ہے وہ آدمی جسے آپ تنبیہ کرتے ہیں،
اَور وہ آدمی جسے آپ اَپنی آئین کی تعلیم دیتے ہیں؛
¹³ آپ اُسے مُصیبت کے دِنوں میں آرام بخشتے ہیں،
جَب کہ بدکاروں کے لیٔے گڑھا کھودا جاتا ہے۔
¹⁴ کیونکہ یَاہوِہ اَپنے لوگوں کو ترک نہ کریں گے؛
وہ اَپنی مِیراث کو چھوڑیں گے نہیں۔
¹⁵ عدل کی بُنیاد پھر سے راستی پر ڈالی جائے گی،
اَور سَب راست دِل اُن کی پیروی کریں گے۔
¹⁶ میری خاطِر بدکاروں کے خِلاف کون کھڑا ہوگا؟
اَور بدکرداروں کے خِلاف میری حمایت کون کرےگا؟
¹⁷ اگر یَاہوِہ نے میری مدد نہ کی ہوتی،
تو میں بہت جلد عالمِ خاموشی میں جا بسا ہوتا۔
¹⁸ جَب مَیں نے کہا، ”میرا پاؤں پھسل رہاہے،“
تَب اَے یَاہوِہ، آپ کی لافانی مَحَبّت نے مُجھے سنبھال لیا۔
¹⁹ جَب مَیں بےحد فِکرمند تھا،
تَب آپ کی تسلّی نے میری جان کو راحت بخشی۔
²⁰ کیا جِس تخت پر ظالِم حُکمراں مُسلّط ہو
اَورجو قوانین کی آڑ لے کر بُرائی کا باعث بَن جائے،
آپ سے رابطہ رکھ سَکتا ہے؟
²¹ وہ صادقوں کے خِلاف اِکٹھّے ہو جاتے ہیں
اَور بے قُصُوروں کو سزائے موت سُناتے ہیں۔
²² لیکن یَاہوِہ میرا قلعہ بَن گئے ہیں،
اَور میرے خُدا میری چٹّان؛ میں جِس میں پناہ لیتا ہُوں۔
²³ خُدا اُنہیں اُن کے گُناہوں کا بدلہ دیں گے،
اَور اُن کی بدکاری کے باعث اُنہیں فنا کر ڈالیں گے؛
یَاہوِہ ہمارے خُدا یقیناً اُنہیں تباہ کر ڈالیں گے۔

(Biblica® آزادانہ اردو ہم عصر ترجمہ™)