¹ یَاہوِہ بادشاہی کرتے ہیں،
وہ عظمت و جلال سے مُلبّس ہیں؛
یَاہوِہ عظمت و جلال سے کمربستہ ہیں
اَور طاقت سے مُسلّح ہیں۔
دُنیا اَپنی جگہ پر مضبُوطی سے قائِم ہے؛
اُسے اُس کے مقام سے ہٹایا نہیں جا سَکتا۔
² آپ کا تخت قدیم سے قائِم ہے؛
آپ اَزل سے ہیں۔
³ اَے یَاہوِہ، سمُندر موجزن ہو گئے ہیں،
سمُندروں نے غُلغُلہ مچا رکھا ہے؛
اَور سمُندروں کی لہریں تلاطم خیز ہیں۔
⁴ زبردست سمُندروں کی گرج سے زِیادہ
اَور سمُندر کی طُوفانی موجوں سے بھی بڑھ کر قوی تر ہیں،
آسمانوں کے، اعلیٰ قادر یَاہوِہ۔
⁵ آپ کے قوانین پائدار ہیں،
اَے یَاہوِہ، ابدُالآباد تک؛
تقدُّس آپ کے گھر کی زینت ہے۔

(Biblica® آزادانہ اردو ہم عصر ترجمہ™)