¹ اَے یَاہوِہ، میرے خُدا! مَیں آپ میں پناہ لیتا ہُوں؛
اِن سَب سے جو میرا تعاقب کرتے ہیں مُجھے بچائیں اَور رِہائی بخشیں،
² کہیں اَیسا نہ ہو کہ شیر کی مانند
وہ میری جان کو پھاڑ کر میرے ٹکڑے ٹکڑے کر ڈالیں،
اَور میرا چھُڑانے والا کویٔی نہ ہو۔
³ اَے یَاہوِہ، میرے خُدا! اگر مَیں نے اَیسا کام کیا ہے،
اَور میرے ہاتھ گُناہ آلُود ہیں،
⁴ اگر مَیں نے اَپنے رفیق کے ساتھ بُرائی کی ہے،
یا بلاوجہ اَپنے حریف کو لُوٹا ہے،
⁵ تو میرا دُشمن تعاقب کرکے مُجھے آ پکڑے؛
اَور میری زندگی کو زمین پر پامال کر دے
اَور مُجھے خاک میں مِلا دے۔
⁶ اَے یَاہوِہ، اَپنے قہر میں اُٹھیں؛
اَور میرے دُشمنوں کے غیظ و غضب کے خِلاف کھڑے ہو جائیں۔
جاگیں، اَے میرے خُدا! اَور اِنصاف کا حُکم دیں۔
⁷ آپ کے اِردگرد مُختلف مُلکوں کی قوموں کی جماعت ہو
اَور عالمِ بالا سے آپ اُن پر حُکومت کریں؛
⁸ یَاہوِہ ہی قوموں کا قاضی ہیں،
اَے یَاہوِہ، میری راستی کے مُطابق،
اَور اَے خُداتعالیٰ، میری دیانتداری کے مُطابق میرا اِنصاف کریں۔
⁹ بدکار لوگوں کی بدی کا خاتِمہ کر دیں
اَور راستبازوں کو قِیام بخشیں۔
آپ ہی واحد خُدا ہیں۔
جو دِلوں اَور دماغوں کو جانچتے ہیں۔
¹⁰ خُداتعالیٰ میری سِپر ہیں،
جو راست دِلوں کو بچاتے ہیں۔
¹¹ خُدا عادل قاضی ہیں، وہ اَیسے خُدا،
جو ہر روز اَپنا قہر دِکھانے ہیں۔
¹² اگر آدمی بُرائی سے باز نہ آئے،
تو خُدا اَپنی تلوار تیز کریں گے؛
اَور اَپنی کمان کو جھُکا کر ڈور کھینچ لیں گے۔
¹³ خُدا نے اَپنے مہلک ہتھیار تیّار کر لیٔے ہیں؛
اَور وہ اَپنے شُعلہ بار تیروں کو بھی تیّار رکھتے ہیں۔
¹⁴ جو شخص بدی کا مُجسّمہ اَور شرارت کا پتلا ہو،
اُس سے جھُوٹ ہی پیدا ہوتاہے۔
¹⁵ جِس نے زمین میں گڑھا کھود کر اُسے گہرا کیا
وہ اَپنی کھودی ہُوئی خندق میں خُود ہی جا گرا۔
¹⁶ جو مُصیبت کھڑی کرتا ہے اُلٹی اُسی پر آ پڑےگی؛
اُس کا تشدّد اُسی کے سَر پر اُترے گا۔
¹⁷ میں یَاہوِہ کی راستی کے باعث اُن کا شُکرگزار ہوں گا
اَور یَاہوِہ خُداتعالیٰ کے نام کی سِتائش کروں گا۔