موسیقی ہدایت کار کے لیٔے۔ یَاہوِہ کے خادِم داویؔد کا زبُور۔ آپ نے یَاہوِہ کی حُضُوری میں اِس نغمہ کو گایا جَب یَاہوِہ نے داویؔد کو اُن کے سَب دُشمنوں اَور شاؤل کے حملہ سے بچایا چنانچہ داویؔد نے یُوں کہا:
¹ اَے یَاہوِہ، اَے میری قُوّت، مَیں آپ سے مَحَبّت رکھتا ہُوں۔
² یَاہوِہ میری چٹّان، میرا قلعہ اَور میرے چھُڑانے والے ہیں؛
میرے خُدا، میری چٹّان ہیں، میں جِس میں پناہ لیتا ہُوں،
وہ میری سِپر اَور میری نَجات کا سینگ، وہ میرا حصار۔
³ مَیں یَاہوِہ کو جو سِتائش کے لائق ہیں پُکارتا ہُوں،
اَور دُشمنوں سے مُجھے بچا لیتے ہیں۔
⁴ موت کی موجوں نے مُجھے گھیرلیا؛
اَور تباہی کے سیلابوں نے مُجھے اَپنی لپیٹ میں لے لیا۔
⁵ پاتال کی رسّیاں میرے چَوگرد لپٹ گئیں؛
اَور موت کے پھندے میرے سامنے تھے۔
⁶ مَیں نے اَپنے خُدا سے فریاد کی؛
مَیں نے اَپنی مُصیبت میں یَاہوِہ کو پُکارا۔
اُنہُوں نے اَپنی ہیکل میں سے میری آواز سُنی؛
میری فریاد اُن کے کانوں میں پہُنچی۔
⁷ تَب زمین کانپ اُٹھی اَور ہل گئی،
اَور پہاڑوں کی بُنیادیں لرز اُٹھیں؛
وہ ہل گئیں اِس لیٔے کہ یَاہوِہ غضبناک ہو گئے تھے۔
⁸ اُن کے نتھنوں سے دُھواں اُٹھا؛
اَور اُن کے مُنہ سے بھسم کرنے والی آگ نکلی،
جِس سے کوئلے دہک اُٹھے،
⁹ اُنہُوں نے آسمانوں کو جھُکایا اَور نیچے اُتر آئے؛
سیاہ بادل اُن کے پاؤں کے نیچے تھے۔
¹⁰ وہ کروبی پر سوار ہوکر اُڑے؛
وہ ہَوا کے بازوؤں پر سوار ہوکر اُڑے؛
¹¹ اُنہُوں نے تاریکی کو اَپنا غلاف،
اَور آسمان کے کالے بادلوں کو شامیانہ بنا لیا۔
¹² اُن کی حُضُوری کی تجلّی سے بادل اَور اولے،
اَور کڑکتی بجلی کی چمک دھمک سے آگے بڑھ رہے تھے۔
¹³ یَاہوِہ آسمان پر سے گرجے؛
اَور خُداتعالیٰ کی آواز گونج اُٹھی۔
¹⁴ اُنہُوں نے اَپنے تیر چلائے اَور دُشمنوں کو پراگندہ کیا،
اَور بجلیاں گرا کر اُنہیں شِکست دی۔
¹⁵ اَے یَاہوِہ، آپ کی ڈانٹ سے،
اَور آپ کے نتھنوں کے دَم کے جھونکے سے،
سمُندر کی وادیاں دِکھائی دینے لگیں
اَور زمین کی بُنیادیں نموُدار ہو گئیں۔
¹⁶ اُنہُوں نے آسمان سے ہاتھ بڑھا کر مُجھے تھام لیا؛
اَور گہرے پانی میں سے کھینچ کر باہر نکالا۔
¹⁷ اُنہُوں نے میرے زبردست دُشمن سے مُجھے رِہائی بخشی،
اَور اُن مُخالفوں سے، جو میرے مُقابلہ میں زِیادہ طاقتور تھے۔
¹⁸ وہ میری مُصیبت کے دِن مُجھ پر ٹوٹ پڑے،
لیکن یَاہوِہ میرا سہارا تھے۔
¹⁹ یَاہوِہ مُجھے کشادہ جگہ میں نکال لائے؛
اُنہُوں نے مُجھے بچا لیا کیونکہ وہ مُجھ سے خُوش تھے۔
²⁰ یَاہوِہ نے میری راستبازی کے مُطابق مُجھ سے سلُوک کیا؛
اَور میرے ہاتھوں کی پاکیزگی کے مُطابق مُجھے صِلہ دیا۔
²¹ کیونکہ مَیں یَاہوِہ کی راہوں پر چلتا رہا؛
اَور مَیں نے اَپنے خُدا کے خِلاف کویٔی بدی نہیں کی۔
²² اُن کے سارے آئین میرے سامنے ہیں؛
اَور مَیں نے اُن کے قوانین سے مُنہ نہیں موڑا۔
²³ میں اُن کے سامنے بے عیب رہا،
اَور اَپنے آپ کو گُناہ سے بَری رکھا۔
²⁴ یَاہوِہ نے میری راستبازی کے مُطابق،
اَور اَپنے ہاتھوں کی اُس پاکیزگی کے مُطابق جسے وہ دیکھتے تھے مُجھے اجر دیا۔
²⁵ وفادار کے ساتھ آپ اَپنے آپ کو وفادار جتاتے ہیں،
اَور کامل کے ساتھ اَپنے آپ کو کامل جتاتے ہیں،
²⁶ نیک اِنسان کے ساتھ آپ اَپنے آپ کو نیک جتاتے ہیں،
لیکن ٹیڑھے اِنسان کے ساتھ ہوشیاری جتاتے ہیں۔
²⁷ آپ حلیموں کو تو بچاتے ہیں
لیکن اُن لوگوں کو نیچا دِکھانے ہیں جِن کی آنکھوں میں مغروُریت ہوتی ہے۔
²⁸ اَے یَاہوِہ، آپ میرے چراغ رَوشن رکھیں؛
میرے خُدا میری تاریکی کو نُور تبدیل کرتے ہیں۔
²⁹ آپ کی مدد سے میں فَوج پر چڑھائی کر سَکتا ہُوں؛
اَور اَپنے خُدا کی بدولت میں دیوار پھاند سَکتا ہُوں۔
³⁰ خُدا کی راہ پکّی ہے؛
یَاہوِہ کا کلام کامل ہے۔
وہ اُن سَب کی سِپر ہے
جو اُن میں پناہ لیتے ہیں۔
³¹ کیونکہ یَاہوِہ کے علاوہ اَور کون خُدا ہے؟
اَور ہمارے خُدا کے سِوا اَور کون چٹّان ہے؟
³² خُدا ہی قُوّت سے مُجھے مُسلّح کرتے ہیں
اَور میری راہ کو کامل کرتے ہیں۔
³³ وہ میرے پاؤں کو ہِرنی کے پاؤں کی مانند بناتے ہیں؛
اَور مُجھے بُلندیوں پر کھڑا رہنے کے قابل بناتے ہیں۔
³⁴ وہ میرے ہاتھوں کو جنگ کرنا سِکھاتے ہیں؛
اَور یہاں تک کہ میرے بازو کانسے کی کمان کو جھُکا دیتے ہیں۔
³⁵ آپ مُجھے اَپنی فتح کی سِپر دیتے ہیں،
اَور آپ کا داہنا ہاتھ مُجھے سنبھالے ہُوئے ہے؛
آپ کی بندہ پروری نے مُجھے بڑا بنا دیا ہے۔
³⁶ آپ میرے قدموں کی راہ کشادہ کرتے ہیں،
تاکہ میں پھسلنے نہ پاؤں۔
³⁷ مَیں نے اَپنے دُشمنوں کا تعاقب کرکے اُنہیں کُچل ڈالا؛
اَور جَب تک وہ تباہ نہ ہو گئے مَیں واپس نہ لَوٹا۔
³⁸ مَیں نے اُنہیں کُچل دیا تاکہ وہ اُٹھ نہ پائیں؛
وہ میرے پاؤں کے نیچے گِر گیٔے۔
³⁹ آپ نے مُجھے جنگ کے لیٔے قُوّت سے مُسلّح کیا؛
اَور میرے مُخالفوں کو میرے قدموں میں جھُکا دیا۔
⁴⁰ آپ نے لڑائی میں میرے دُشمنوں کو پیٹھ دِکھانے پر مجبُور کیا،
اَور مَیں نے اَپنے حریفوں کو تباہ کر دیا۔
⁴¹ اُنہُوں نے مدد کے لئے پُکارا، لیکن اُنہیں بچانے والا کویٔی نہ تھا۔
اُنہُوں نے یَاہوِہ کی بھی دہائی دی، لیکن اُنہُوں نے جَواب نہ دیا۔
⁴² تَب مَیں نے اُنہیں پیس پیس کر ہَوا میں اُڑتی ہُوئی گَرد کی مانند بنا دیا؛
اَور مَیں نے اُنہیں گلی کوچوں کی کیچڑ کی مانند روند ڈالا۔
⁴³ آپ نے مُجھے لوگوں کی یلغار سے بھی چھُڑا لیا؛
اَور مُجھے قوموں کا سردار بنا دیا؛
اَور جِن لوگوں سے میں واقف بھی نہ تھا وہ میری خدمت کرنے لگے۔
⁴⁴ میرا نام سُنتے ہی وہ میری اِطاعت کرنے لگتے ہیں؛
پردیسی میرے آگے جھکتے ہیں۔
⁴⁵ وہ سَب گھبرا جاتے ہیں؛
اَور تھرتھراتے ہُوئے اَپنے قلعوں سے باہر نکل آتے ہیں۔
⁴⁶ یَاہوِہ زندہ ہیں! میری چٹّان مُبارک ہو!
اَور میرا مُنجّی خُدا ممتاز ہو!
⁴⁷ وُہی خُدا ہیں جو میرا اِنتقام لیتے ہیں،
اَور قوموں کو میرے سامنے جھُکاتے ہیں،
⁴⁸ وہ مُجھے میرے دُشمنوں سے بچاتے ہیں،
آپ نے مُجھے میرے حریفوں پر سرفرازی بخشی؛
اَور تُند خُو لوگوں سے مُجھے بچایا۔
⁴⁹ اِس لیٔے اَے یَاہوِہ، میں قوموں کے درمیان آپ کی تمجید؛
اَور آپ کے نام کی مدح سرائی کروں گا۔
⁵⁰ وہ اَپنے بادشاہ کے لیٔے رِہائی کا بُرج؛
اَور اَپنے ممسوح داویؔد اَور اُن کی نَسل کو
ہمیشہ اَپنی لافانی مَحَبّت میں رکھیں گے۔